3168/2023-2024
Food, Civil Supplies & Consumer Affairs Department hnuaia ration buhfai hi mi harsa zualte ei leh bara chhawmdâwlna tur a ni a. Kan state thenawm: Tripura, Arunachal Pradesh leh Assam-ah te chuan Central Sorkar atanga a thlawna buhfai state-ten an dawn bak hi chu an sem lo a. Mizoramah chuan mipui harsatna hrethiamin sorkarin ama sensovin ration card vâr hmangin mipui nawlpui hnenah retailer kal tlangin buhfai man tlâwm zawka leina remchang a siam thin a ni.
Sorkar chuan Ration Card vâr hmang chhungkaw tam tak, ration buhfai la lo thei dinhmuna dingten an ration card neih mek chu sorkara surrender an duh tih a hria a. Hemi atan hian ration buhfai lakna tur ni lo Ration Card hi chhungkaw member tihchianna atana document pawimawh tak a nih avangin Not Entitled for Ration (NER) Card chu April 2015 atang khan sorkarin a siam chhuak a.
Ration card hi thil pawimawh hrang hrang tih nana document pawimawh a nih avangin hman tulna a awm thin a. Hetiang mite tan liau liau hian sorkarin a kalpui mêk sa, mahni ration card hman lai ration buhfai lakna tur ni lo, Not Entitled for Ration (NER) card-a, thlak duhte tan Food,Civil Supplies & consumer Affairs Department official website https://fcsca.mizoram.gov.in/page/ration-neilo-not-entitled-for-ration-ration-card-duhte-tana-dilna ah online-in a dil theih a ni.
Hemi kaihhnawiha hriat duh neite chuan phone call emaw whatsapp message emaw hmangin phone number 6009861030-ah hian office hun chhungin eng lai pawhin a zawh fiah theih a, a tûl angin department chuan a lo tanpui ang.
NER CARD CHUNGCHANG HRIATTIRNA 22 DEC 2023 FCS&CA.pdf
