Parliamentary Standing Committee on Chemicals & Fertilizers memberte leh Mizoram sawrkar aiawhte chu vawiin chawhma dar 9 khan State Guest House Conference Hall-ah an inkawm a, Lei tihthatna (fertilizers) chungchanga Mizoramin harsatna a tawhte leh a sutkian dan turte an sawi ho a ni.

He inkawmhona hi Shri Gopinath Munde, Chairman, Parliamentary Standing Committee on Chemicals & Fertilizers chuan a kaihruaia, Mizoram sawrkar awiawhte hi Pi L. Tochhawng IAS, Principal Secretary, Government of Mizoram in a ho a ni.

Pi L.Tochhawng chuan M.P. rual lo kalte hnenah hian Mizoram rawn tlawha kan harsatnate rawn zirchiang tura an rawn kal chu lawmthu hrilhin, Mizoramin lei tihthatna (fertilizers) chung changa harsatna chi hrang hrang a tawhte leh heng harsatnate hi sut kian a nih theih na atana ruahmanna Mizoram Sawrkarin a siamte chu MP rual te hnenah hian a thlen a, anni pawhin nimina Sihphira loneitute nena an inkawmhona an hlawkpui thu sawiin, Mizoram chu India ram pumah average a lakin lei tihthatna (fertilizer) hmu tlem ber ani a, hei hian loneitute tan pawh harsatna a thlen nasa hle a ni an ti a, Mizoramin harsatna a tawhte an hriatthiampui thu leh heng harsatnate sukiang tur hian hma lak zui ngei an tum thu an sawi a, Mizoram sawrkarin an hnena an thu thlente pawh zirchiana bawh zui an tum thu sawiin. Mizoram Sawrkar leh mipuiten an lo mikhual danah an lungawi thu leh an lawm thu an sawi bawk a ni.

He meeting-ah hian Mizoram Sawrkar  hnuaia Agriculture, Horticulture, Soil & Water Conservation leh Fisheries Department aiawhte an tel a ni.

Agriculture Minister Pu H.Liansailova chuan nizan khan State Guest House-ah M.P. rual te hi zanriah a buatsaih sak a, Mizoram Sawrkar Minister te leh Parliamentary Secretary te an tel kim hle a ni.

M.P. rualte hian vawiin chhun khan Guwahati panin Aizawl an chhuahsan a ni.