State Election Commission chuan Mara Autonomous District Council General Election lo awm tur kaihhnawihnah thuchhuah siamin, Electronic Voting Machine (EVM) hman a nih tur te; voter zinga EPIC neilo an awm chuan an nihna (identity) tichiang theitu tur document dang (passport, driving licence, PAN card, Service ID, passbook, property document, SC/ST/OBC Certificate, Residential Certificate, Pension Document, Freedom Fighter Identity Card, Arms Licences, Physically Handicapped Certificate, Job Card, Health Insurance Scheme Smart Card emaw Students’ Identity Card)-te hman theih a nih tur thu te; MADC huamchhunga Sawrkar hnathawkte tan Code of Conduct zawm tur a nih thu te, Polling Booth leh Counting Hall-ah te meizuk leh mobile phone hman phal a nih loh tur thu te chhuah a ni.

May ni 2, 2017 tlai dar 5:00 atanga May ni 4, 2017 tlai dar 5:00 chhung (poll khar hun hma darkar 48) hian candidate te tan campaign phal a ni lova, opinion poll emaw exit poll emaw mipui vantlang hriatah chanchinbu emaw electronic media emaw kaltlanga puanzar leh thehdarh khap a ni bawk a. Mara Autonomous District Council (Constitution, Conduct of Business, etc.) Rules 2002-a Rule 7 Sub-rule (5) hmangin State Election Commission chuan inthlan hun chhunga candidate-te lirthei hman tur Returning Officer hnenah register turin leh hman theih dan khuahkhirhna thu a chhuah bawk. Vote thlak ni, Poll Day-ah hian MADC chhhungah hian contesting candidate-te tan an hman tur lirthei pakhat theuh leh election agent leh party worker-te hman tur lirthei pahnih phalsak an ni a, candidiate-te leh an agent ten an lirthei hmangin voter-te voter te polling station-ah an hruai/lam phal a ni lova. Candidate leh an agent-te hi four/three/two wheeler lirthei (taxi leh autorickshaw tiamin) chauh an hmang thei ang a, vote thlak ni hian four-wheeler pakhatah mi panga aia tam chuan phal a nilovang a, hei hian sawrkar hnathawk duty a kal te leh damlo leh kum upa zawkte phurhna a huam lovang. Candidate-te, an agent-te leh party worker-te chu poll khar hun hma darkar 24 atang chuan lirthei 3 leh a aia tam inzui (convoy) phal a ni dawnlo bawk a ni. Election kaihhnawih nilo thilah chuan candidate-ten election atan an registered vehicle ni lo lirthei dang an hmang thei ang.