Vawiin khan State Election Commissioner Pu C. Ropianga chuan Mara Autonomous District Council inthlan chungchang ngaihtuahin a pisaah Meeting pawimawh a ko. Sorkar laipuiin a din Second Administrative Reforms Commission duh dan angin Mara Autonomous District Council leh Lai Autonomous District Council ten an Autonomous District Council (Constitution, Conduct of Business etc) Rules, 2002 an siam tha a, Governor remtihna lain an inthlanna State Election Commission mawhphurhnaa dah a ni ta a. Hetihlai hian Chakma Autonomous District Council pawhin Rules siamthaa Notification chhuah mai turin chak takin hma an la a, reiloteah peihfel anih beisei a ni.
Mara Autonomous District Council hi kumin May thlatirah an term a lo tawp dawn tak avangin Mara District Council inthlanna atan Electoral Rolls Summary Revision neih dan tur te, a hun taka inthlan a nih theihna tura inbuatsaihna kalpui dan tur te leh inthlanna felfai leh thianghlim neihna tura ruahmanna te he meeting-ah hian sawiho a ni.
Meeting-ah hian State Election Commission Secretary leh Deputy Secretary te bakah District Council inthlan lo buaipuia thil kalhmang lo hre tawh Saiha DC aiawh te, District Council Affairs leh Law Department aiawh te an tel a ni.
