State Level Fire Prevention Committee chu vawiin khan Chief Minister Office’s Conference Room-ah Chief Minister Pu Lal Thanhawla & Chairman, State Level Fire Prevention Committee ni bawk kaihhruaina hnuaiah meeting neih a ni.

Meeting-ah hian Sub-Committee on Fire Prevention in, ni 21.11.2011 a thutlukna alo siam tawh chu meeting in pawmpui tura chhawpchhuah a ni a. Chief Minister chuan thuhma a sawiah, kangmei chhuak thei lakah mipuiten fimkhur nachang kan hre chho ta viau chu thil lawmawm tak a ni a ti a. Hei hi Green Mizoram kan hman thin rah pakhat anih a rin thu a sawi a. Hei hian kangmei thil tihchhiatte pawh a tlem sawt phah viau a, mahse kan state tet dan chhut chuan ala nasa hle a ni a ti.Kumin phei chu khua a ro avangin kan fimkhur lehzual a tul dawn a ni, Chief Minister chuan ti.

Sub-Committee in alo rel tawh angin, kum danga lo tih tawh angin March ni 15 hma ngei khian lo hal nise, Lengpui airport leh a chhehvela lo/huan hal turte chuan tlai dar 3 hnu lamah chauh hal tura hriattir nise tiin, Kolasib, Mamit leh Aizawl D.C. te chu hma la tura hriattir nise a ti a ni. Khawthlang lamah lo hal hun hi an tlai thin avangin March ni 15 hma ngeia an hal zawh vek theih nan Mamit leh Kolasib D.C. ten hma taka hriattirna chhuah a, chak taka bawhzui tura hriattir nghal nise meeting chuan a ti bawk a. Kum 2010 December atanga May 2011 thlenga kangmei chhuak chu hmun 58 ah niin, ram hectare 1259.95 a kang chhia a, hei hi Rs.1,66,000.00 hu vela chhut a nih thu meeting-ah hian tarlan a ni.

Kumina Fire Prevention Week chu ni 3 February 2012 atang khian hman tan nise meeting chuan a ti a, hawnna hmun turah chuan mi sawm turte a zirin la tih fel nise a ti a ni.

Meeting-ah hian committee memberte an kal tha hle a ni.