Vawiin chawhma dar 10:30 khan Mizoram Journalists Association, Saiha District te chuan Annual Conference, 2012 chu I & PR Conference Hall, Saiha-ah an nei.

He Annual Conference-ah hian kum 2012 - 2014 chhunga hruaitu thar turte thlanna an nei a, President ah Pu C.Z. Hluna, Editor, Buannel. Vice President Pu C.L. Zama, Editor, Saikhawpui leh Treasurer atan Pu Lalnunkima Pisa, Manager, Hnialum Skylink Vision te thlan tlin an ni. Executive Member atan heng mi panga te hi an thlang tling nghal bawk. 1) Pu M. Baithai, Editor, Chhim Aw; 2) Pu B. Vanlalhriata, Editor, Saiha Post; 3) Pu BB Pacho, Editor, Awsicharu; 4) Pu V. Pawhla, Manager, New Skylink Vision; 5) Pu T. Lalrosiama, Editor, Tipa Express te an ni.

He inthlanna hi Dr. K. Rakhu, President, MTP General Hqrs., Saiha leh a thawhpui ten an neih pui a. Chawhnu lamah programme hran nei leh in President thlan thar Pu CZ Hluna chuan Presidential Address a sawi nghal a, Pu Dony Lalruatsanga, DTO Saiha chuan khuallian niin a hmanpui a ni. Thusawiin khuallian cuan chanchinbumite chu hmalam pana hmasawn zel turin duhsakna a hlan a, taimakna leh tumruhna nen mahni hnaa rinawm taka thawk turin a chah bawk a ni. Programme karlakah zaithiam zai te pawh ngaihthlak a ni.

He MJA Annual Conference-ah hian Saiha District chhunga chanchinbumite an tel kim hle a, Editor hranghluite pawhin he conference hi an hmanpui a, tlailamah ruai an kilho nghal a ni.