Vawiin khan Kolasib DC Conference Hall-ah Centralised Public Grievances & Monitoring System chungchang training neih a ni a. Kolasib DC Pi Niharika Rai, IAS chuan hei hi hmanpuiin Deptt. hrang hrang officer te leh Computer operator te chu lang tlang sawrkar tha kan neih theih nana in zir thiam turin a chah a ni.

Pi Rai chuan, National Informatic Centre Aizawl atanga hetiang training buatsaih a ni chu a lawmawm hlea a hriat thu sawiin mipui te harsatna neih chinfel kawngah a tangkai hle dawn a ni, a ti a. Department tina thawktuten mipui te au hla leh manganna kan ngaihthlak a, chinfel dan kawng kan zawn hi kan tihtur dik tak a ni, tiin hei hi sawrkar ngaih pawimawh em em a ni, a ti a ni.

Training-ah hian NIC, Aizawl atangin mi 2 in zirtirna an pe a. Mipui ten Internet emaw lehkha emaw hmanga rawtna, sawiselna leh hriat duh an neih te chinfel dan tur zir ho a ni a. Sawrkar langtlang a awm theih nana mipui ten an chanvo an chan theih nana lo dawnsawn dan tur leh District bikah chuan DC chu lungawilohna thlenna hmasa a nih thu leh hun reiloteah hemi enkawltu bik Officer ruat a, he Central Public Grievance and Monitoring System CPGRAMS hi February thla ngeia hman tan tum a nih thu sawilan a ni a. Central sawrkar chuan reiloteah Public Grievance Commission a din dawn thu pawh tarlan a ni.

Zawhna, chhanna leh sawihona hun hman a nih hnuah Pu Lalchungnunga, SDO(S) chuan lawmthu sawiin training hi tihtawp a ni.