Vawiin khan Mizoram University hnuaia Public Administration zirchhuak tawh pawl intelkhawm Alumni Association of Public Administration (AADPA) buatsaihin tualchhung inrelbawlnaa mipui lam chan chungchang zirhona ‘Seminar on People’s Empowerment & Local Self-Government’I&PR Conference Hall-ah neih a ni a. Chief Secretary Pu Vanhela Pachuau chuan Khuallian chan changin Seminar hi a hawng a ni.

Chief Secretary chuan mipui rorelna democracy-ah reng reng chuan thuneihna insemzai (decentralisation) hi thil pawimawh hmasa a ni fo thin a, hmasawnna ruangam duan leh kalpui kawngah te, sorkar hmalak thlithlai kawngah te, ram khua leh tui, thingtlang leh khawpuia mite pawh a bulthum atanga thil hria a, an inrawlh ve fo hi a tul thin a ni, a ti. Tunlai khawvelah “change” kan sawi uar hle lai hian thil tha zawk thlen tir tak tak tur chuan mi tupawh, ram hruaitu, sorkar hnathawk leh mipui mimir te pawhin mahni hlawkna ngaihtuah lova a man kan pek inhuam a tul ber fo ang, a ti a. Khawtlang inrebawl kawnga hmeichhiate dinhmun sawhngheh chungchang sawiin Pu Vanhela Pachuau chuan Mizo zingah pawh hmeichhiaten dinhmun leh mawhphurhna sang zawk an luah mek a, hemi kawngah pawh hian mipui mimir inhrilhhriat chu thil tangkai tak a nih a rin thu a tarlang a ni.

Seminar-ah hian Khual Zahawm chan changin Prof. C. Lalkima, tuna ICFAI Registrar hna chelh mek leh Mizoram University-a Public Administration Department bultumtu bulpui ber pakhat pawhin thuhma a sawi a. Seminar kalphung tur leh an thupui khel tur tlangpui Prof. Lalneihzovi, MZU chuan sawi hawngin India Danpui siamthat vawi 73-na leh 74-na Mizorama hman ve a hun tawh dan te a sawi fiah a ni.

Nilengin thupui thlanchhuah hrang hrang chhiar chhuah leh sawihona hun hmanah hian tualchhung mi langsar thenkhat te, sorkar mi pawimawh leh University zirlai thahnem tak an tel a ni.