Vawiin zing dar 10- 1.30 p.m thleng khan Conference Hall, Aijal Club-ah ‘2nd Consultative Meeting on Mizoram State Disaster Management Plan’ neih a ni a, Pu T.V. Fambawl, Secretary, DMR-in a kaihruai a, Central lam atanga lo kalin DMR Plan siam phek 150 zeta chhah chu pharhin a sawifiah a ni. Hemi hnu hian member kalten sawihona leh rawt belh duhte kan sawiho leh a. Pu Dominic Lalhmangaiha, State Project Director-in sawihona tlangpui a kaihruai a; belh tul nia hriatte leh siamthat ngai nia hriat apiang sawiho hnuin, Department hrang hrangten belhchhah ngai an tih apiang ziaka theh lut turin hrilh nghal an ni.

Sawihona atangin District tinaDisaster Management Chairman atan D.C. an ni theuh ang a, Co-Chairman atan DRDA Project Director ni tura ruahman chu tidanglamin, Additional D.C. te ni theuh se tiin lungrual taka rel a ni.

Chhiatna rapthlak- Kangmei, leimin, thlipui rapthlak leh a dang lo thlen hian khawtin/ Vengtina Local Council /Village Council President te chu mahni khuaa sorkar atanga thuneitu sang ber a nih avangin, VC Member te leh YMA hruaitute inkara thawhhona tha a awm theih nan tan la thar theuh se an duh thu an sawi a. VC/Local Council te hi khaw chhunga roreltu an ni a. YMA tlangval- nula te hi tanpuitu hnai reng an nih avangin, VC/Local Council hotu apiangten lo thawhpui tha se, theihpatawpa tangho tur an nih avangin thawhho that a tul ber tih sawilan a ni. Thuneihna inchuh lovin, tangrual theuh turin an ngen nghal a ni.

Chhiatna rapthlak engpawh thleng se, YMA te hi thleng hmasa leh buaipuitu hmasa an nih avangin YMA hotuten mawhphurhna la thuai sela; sorkar mite- Police/ Fire Services te an lo thlen chuan chung mite rorel ang chu zawm thiam zel thei se. Kangmei emaw, Leimin avanga chhiatna tawkte chhungkaw bungrua te venhim sak a, senghawi sak hi a him theih nan VC/YMA hruaituten theihtawp chhuah nghal thin se duhthusam a ni.

Tlawmngaia chhuak karah misual, thil ruk ching an awm fo avangin, YMA ten mi bungrua venhim hna lo thawk thuai zel se a duhawm.

Hetiang chhiatna rapthlak lo thlena vantlang mipuite thudik hriattir a, puang zar tha turin Media mite: Local Tv te, Chanchinbu mitten theihtawp chhuah lehzual se a tha hle ang a; hemi thuah hian I&PR te leh Disaster Management Department te thawhhona a pawimawh hle dawn bawk a ni. Mizoram hi Lirnghing na tak thlen mai hlauhawmna hmun a nih avangin mipuiten hemi kawng zirtir zel chu Chanchinbu mite leh VC/YMA ten nasa taka uar zel pawimawh an tih thu an sawiho bawk.