Vawiin chhun dar 12.00 khan Chief Secretary Pu Vanhela Pachuau kaihhruaina hnuaiah Aizawl khawpui chhunga sawrkar leh mimal school tina hotute leh district tina Deputy Commissioner te, District Education Officer te, District Council tina Education lama mawhphurtute chuan Vanapa Hall-ah meeting pawimawh tak an nei a. He meeting-ah hian Supreme Court-in ni 22.9.2011 leh ni 13.1.2012 a Order a chhuah tihhlawhtlin ziktluak a nih theihna tur chungchang sawiho a ni.

Supreme Court chuan tlawmngai pawl pakhat – Environmental & Consumer Protection Foundation leh Delhi Administration & Others inkhinnaah thupek siamin, India ram State leh Union Territory zawng zawngte chu an huam chhunga school zawng zawngah zirlaite tan heng thil - tui intur thianghlim te, mipa leh hmeichhe inthiarna hran ve ve te, electric eng te, school hungna te, chawchhun te, kangmei thelhna hmanrua te, telephone te, rualbanlote tana remchang te 31.3.2012 hmaa ruahmansak vek turin a ti a. Hemi chungchangah hian Chief Secretary theuhte chu he Supreme Court thupek zawm a nih danah ni 28.2.2012 thleng affidavit hmanga report thehlut turin a hriattir a ni.

Chief Secretary Pu Vanhela Pachuau chuan, “Supreme Court thupek hi a khauh hle a; thudik chanve hmanga report thehluh chi a nilova, kan zavaia tangruala tihhlawhtlin kan tum ngei tur thil tul leh pawimawh a ni” a ti a. Hriselna lama Mizoten tan kan lak lehzual a pawimawh thu sawiin Chief Secretary chuan, “School tinah mipa leh hmeichhiate tana inthiarna changtlung tak te, tui intur thianghlim pek te hi kan tihmakmawh a ni a. Tin, kan inthiarnate hi kan vawngfai tur a ni. Aizawl Civil Hospital-a kum khat chhunga damlo enkawl zat leh phai damdawi in lama inenkawl zat atang ringawta chhut pawhin hriselna lama kan dinhmun hi inbihchianna tham a tling a ni” a ti bawk.

Pu P. Chakraborty, Principal Legal Adviser pawhin thu sawiin, “Supreme Court thupek hi a taka kenkawh a nih dan vil turin Chief Secretary tinte chu ruat an ni a; thu dik chanve hmanga report kan thehluh chuan Court thupek zahlohna a nih dawn avangin jail tan thlenga hrem theih a ni. Chuvang chuan palzam ngam chi a ni lo” a ti.

Education Secretary Pi Esther Lalruatkimi chuan Mizoram chhung school-a tui intur thianghlim pek a nih dan tarlangin – primary school-ah 81 %, middle school-ah 88 %, high school-ah 65.82 % leh higher Secondary school-ah 100% niin; inthiarna lam dinhmunah Aizawl district dinhmun zaa 53.42 a nih lai a district tam zawkten school zaa zaah mipa leh hmeichhe inthiarna nei anga an report chu rinhlelhawm deuha a hriat thu a sawi a. “Kan nihna bak inchhal lovin, kan harsatnate leh kan sum mamawhte Supreme Court-ah hian thlen mai a him zawk a. Tui intur thianghlim leh inthiarna tih loh Supreme Court-in ti tura min phut thil thenkhatte hi chu a hranpaa sum ngaihtuah ngai chi a ni” a ti bawk.

He meeting-ah hian palaite tan an harsatnate leh an dinhmunte sawina hun zau tak hawnsak an ni.