Sorkar laipui Flagship Programme MGNREGA hian thingtlanga cheng chhungkaw tin a duh apiang tan kum khat chhunga ni 100 inhlawhna ruahman sak bakah thingtlang mite tana thil rotling siamsak hi a tum a ni a. He scheme hnuaiah hian hlawhtling tak leh chak taka hmalak a nih theih nan Mizoram sorkar hnuaia Rural Development Department chuan theihtawpin hma a la mek zel a. Sorkar kum kal lai mek 2011-2012 chhunga a hman turin Central sorkar chuan January, 2012 chhung hian District 8 (pariat) tan Rs. 126.84 crores a rawn pechhuak leh a. Kum 2011-2012 chhunga MGNREGA hnuaia hmalakna atan Central sorkar atanga State sorkar in a sum dawn tawh zawng zawng chu Rs. 311.95 crores niin hemi do let nan hian State sorkar chuan Rs. 24.11 crores District 8 (pariat) hnenah a pe chhuak ve bawk a ni. Central sorkar atanga sum dawn leh State sorkar in a pekchhuah belhkhawm hi Rs. 336.06 crores a ni. Kumin 2011-2012 hian kum dang zawng aiin hmuh a tam a, inhlawhna tam zawk Job Card neitute hnenah pek theih beisei a ni.

State sorkar in MGNREGA hnuaia hmalak tantirh atanga sum a dawn tawh dan chu hetiang hi a ni : 2005-2006 ah Rs. 6.66 crores, 2006-2007 ah Rs. 21.52 crores, 2007-2008 ah Rs. 33.98 crores, 2008-2009 ah Rs. 155.62 crores, 2009-2010 ah Rs. 224.33 crores, 2010-2011 ah Rs. 268.66 crores te an ni.

Kum 2011-2012 chhung hian State sorkar in Central sorkar atanga sum a dawn tawh atang hian District zawng zawng ah ni 100 inhlawhna pek theih vek tura hmalak mek a ni.