Vawiin chhun dar 12.00 Noon khan MADC Complex-ah MADC 11th Term    a Chief Executive Member (CEM)  atan Pu N. Zakhai, Amobyu Constituency atanga INC Ticket a thlantlin  chu Pi Harleen Kaur IAS, Deputy Commissioner, Siaha District chuan rinawmna thu tiam tirin a la lut a ni. 

Nimin chhun  dar 12:00 Noon-ah khan MADC 11th term atana MDC thlantlin mi 25 te chu Pu Jeff M.Sanga, Court President & Recorder, MADC chuan rinawmna thutiam tirin a lo la lut tawh hlawm a ni. Nimin-ah khan CEM hi lakluh tur a ni laiin, Mizoram sawrkar atanga pawmpuina lehkha an dawn hman loh avangin CEM hi vawiinah lakluh a ni ta a ni. 

CEM lakluh thar Pu N.Zakhai chuan a thawhpui tur EM (Executive Member) paruk hming a puang nghal a. Chungte chu: 1) K.Hrahmo 2)MH.Tiabi 3) K.Chhuabei 4) FC Lawmkima 5) KH Beihlo leh 6) V. VB. Byhna te an ni. Heng EM 6 te hi  MADC 10th Term-a EM nilai te vek an ni a, EM Post 2 la hnawhkhah lo a la awm a ni. 

Pu N.Zakhai chuan CEM a lakluh a ni tawh hnuah thu sawina hun tawi hmangin, Mara mipuiin Congress sawrkara rinna nghata MADC 11th Term-a rorelna kalpui tura MDC 17 lai an thlangtling leh chu, Pathian leh Mara mipuite hnenah lawmthu ka sawi tak zet a ni, a ti a. Pu Lal thanhawla leh a thawhpui Minister te leh Party hruaitute hnenah thahnem ngai taka  MADC Election chhunga an tanpuina leh tawiawmna avangin lawmthu a sawi bawk. Returning Officer Pi Harleen Kaur IAS, District Bawrhsap leh Election bawipuitu Official zawng zawngte hnenah pawh  Free leh Fair  Election leh inthlanna boruak muanawm taka an awmtir theih avangin lawmthu a sawi bawk a ni. Pu N.Zakhai chuan kei leh ka thawhpui ten Kan Party Manifesto tihhlawhtlin ngei kan tuma, chumi atan chuan Mara ram mipui te tawiawmna leh finchhuahna kan mamawh reng dawn a ni, a ti bawk. 

Vawiin C.E.M. lakluhna inkhawm hi Pu V.Zacho Executive Secretary, MADC in a kaihruaia, Rev.AZ Beirona, Gen.Secretary CCI(M) Hqrs chuan hunserh hmangin, Rev.B.Beilua, New Colony Bialtu Pastor in malsawm tawngtaina in vawiin programme hi a khar  a ni.