Kumin 2012 May thla a sawrkarna siamtu Mara Autonomous District Council (MADC) Sawrkar chuan vawiin khan an office kawt tualzawlah an sorkar lawmna vantlang inkhawm an buatsaih a, Mizoram chhim lam fanga thang mek, Chief Minister Pu Lal Thanhawla chuan Khuallian niin a hmanpui.
Chief Minister chuan democracy rama kan hruaitu tur kan thlan thinte hi mipuite chuan kan tawiawm tur a ni tiin, duhkhawploh kan neih laite chu a tha zawngin kan sawisel ngam tur a ni, a ti. Mipui ten hotu tha leh dik kan duh ang bawk hian hotute hian mipui tha, dik leh taima an duh ve bawk a ni, a ti a. Inthlana tling ten thuneihna an neih hi mahni leh lainate sahmim tih puarna tur a ni lova, midangte tana malsawmna thlentu a ni zawk tur a ni, a ti.
Chief Minister chuan sorkar flagship programme NLUP chu kum 5 chhungin an hlawhtling vek hman dawn lo a ni, tiin, hemi hnu lama a endik leh a vil hna thawk chhunzawm zel turin ‘exit protocol programme’ pawh siam a ni, a ti a. An sawrkar chhung hian chhungkaw 1,20,000 tuam turin sum pawh a awm vek a ni, a ti. Thalaite tana khawvel thar siam mek anih thu sawi bawk.
Chief Minister chuan infiamna, zirna ah te nasa taka hmalak a ni a, sipai ah awlsam zawka an luh theihna turin hmalak mek zel anih thu a sawi a. Eifukna, corruption umbo kawngah Sawrkar chu tuma fuih a ngailo tiin, puih erawh an hniallo a ni, a ti a. Corruption hian sorkar sum eiruk chauh a huam lova, zawmthawtna te, thatchhiatnate, dawngdahnate, mahni hnaa tui lohna te, kuttling lova sum lak duhnate a huam vek a ni, a ti. Chuvangin a chhelai siam tha turin koh vek kan ni a ti. Chief Minister chuan hnam hnufualbik anga inngaihna chu tha a tih loh thu sawi a, Mizoram leilung fate vek kan ni a, kan mawhphurhna leh chanvo a in ang vek a, tumah inla hrang tur bik kan awmlo a ni, a ti a. MADC chu central sorkar din a ni a, State sorkar chuan kan enkawl mai tur a ni, a ti.
Khualzahawm Tourism Minister Pu S.Hiato chuan Pawi Lakher District Coucil hi Central sawrkarin kum l952 a din, 1972 a thendarh anih hnu a hmasawnna tamtak an neihte chu lawm tlak a tling a ni, a ti a. District Council a hnathawktute avang pawh hian kohhran thlengin an tangkaipui a ni, a ti. MADC huam chhunga khua zawng zawng deuhthaw tui pek tawh a ni, a ti a, Mizoram hmun hrang hrangah Tourist Lodge 8 sak mek a nih thu a sawi bawk.
He lawmna inkhawm hi MADC Chairman Pu Hipheia’n a kaihruai a, Chief Executive Member Pu R.T. Zachono pawhin thusawiin tunhma zawnga MADC Plan sum punna chu cheng nuai 250 vel anih laiin Pu Lal Thanhawla sorkar chuan kum 2009 - 2012 chhungin cheng nuai 1238 in min tih pun sak a, kum 2012 - 2013 atan cheng nuai 2195.33 a pungchho tura ruahmanna siam mek a ni, a ti
