311/2023-2024

Aizawl, 3rd May 2023: Zankhat riaka Mizoram rawn tlawh tur Madhya Pradesh Legislative Assembly Speaker Pu Girish Gautam leh a thawhpuite chuan vawiin khan Aizawl an lo thleng a, Assembly Speaker Pu Lalrinliana Sailo nen Speaker Office-ah inkawmhona hun tha tak an nei.

He hunah hian Assembly Speaker Pu Lalrinliana Sailo chuan Pu Girish Gautam leh a thawhpui ten Mizoram an rawn tlawh chu lawmawm a tih thu a sawi a. Mizoram chu ram nuam leh ralmuang, vantlang nunphung khaihlak zawnga chetna awmlohna a ni, a ti a. Mizoram chanchin tlangpui inhrilhhriatna hun a hmang bawk.

Pu Girish Gautam pawhin thu sawiin India chu hnam ziarang leh tawng hrang tam tak awmna ni mahse mitinte chu India leilung fate vek an ni, a ti a. Mizoram inthlan hrang hrangah vote thlaktu thahnem tak an awm thin chu entawntlak a tih thu a sawi a. Madhya Pradesh pawhin kumin kumtawpah Mizoram ruala inthlanpui an hmachhawn ve tur thu sawiin, tluang taka mipui ten roreltu an thlan theih nan duhsakna a hlan nghal bawk.

Pu Girish Gautam leh a thawhpuite hian hmarchhak state pali Tripura, Mizoram, Assam leh Manipur te an tlawh dawn a. Mizoram Legislative Assembly hnuaia Financial Committee hrang hrang - Public Accounts Committee (PAC), Estimates Committee leh Committee on Public Undertaking (COPU) te hnathawh dan bakah 'paperless assembly' E-Vidhan kalpui dan te an rawn zirchiang dawn a ni.

Madhya Pradesh Speaker Pu Girish Gautam hi Assembly Public Undertaking Committee Chairman Pu Gauri Shankar Bisen, Public Accounts Committee Chairman PC Sharma, MLA Pu Divvaraj Singh leh official dang ten an lo tawiawm a ni.