Ni li awh tur Mizoram  Art Development Society  member  te kutchhuak  lemziak leh lemtuk phochhuahna MADS Annual  Art Exhibition  vawi 6-na chu vawiin khan I & PR Department Director Pu David L.Thangliana chuan State Archives Hall Zarkawt,Aizawlah a hawng.

Mi 47  laiin an kutchhuak 172 zet an phochhuak thei leh MADS  din champha vawiin  ah Art Exhibition neih theih ani chu  a lawmawm thu  leh member te inbuatsaihna leh  thawhrimna ah Director Pu David Lalthangliana chuan fakin lawmthu a sawi a. He Exhibition ah hian artist te kutchhuak thar, khawi hmunah mah la tar chhuah loh  hmuh tur  te a awm avang chuan art lamah hmasawnna nasa tak kum tin a awm a ni a ti.

I & PR Department chu Visual Art  enkawltu Nodal Department anih angin  Art tih hmasawnna  kawngah theihtawp a chhuah mek reng a, hmasawnna a awm theih chuan  umzui zel a tha  tiin I & PR Director chuan tun thla a Delhi a Rajiv Gandhi Indoor Stadium a  Mizo te kutchhuak phochhuah ani tur te pawh  hi hmasawnna a ni  a, hlawhtling taka lo haw ngei turin MADS member te  duhsakna a hlan a ni.

Arts lam thiam te hi Pathianin  talent a pek vang ani a,lehkha thiam,zaithiam leh hausak avang ngawta thiam leh tih theih ani ngawt  lova.Hmasang thlalakna te hmuhchhuah a la nih hma atang tawhin lemziak thiamte avanga  Isua hmel hmang ni awm tak te, Napoleon te, Abraham Lincoln  leh midangte hmel put hmang hriat theih phah  anih thu Pu Davida chuan  sawiin MADS member te chu  tan hona nasa tak nen  thawk ho zel turin a fuih a. Nodal Department nihna angin  I& PR Department chuan  theihtawp chhuahpui an inhuam a ni a ti a. Hlawhtling taka Art Exhibition chu hmang turin duhsakna a hlan nghal a ni.

Pi Lallianpuii  Joint Director, I & PR Department, State Nodal Officer ni bawk  chuan  Arts lama hmasawn zel tur hian inthlahdah lova   awm a tul thu leh  a market lam te  thlir thiam a pawimawh a ni a ti. Lemziak leh Thlalak hi a in ang lo va ,thlalak chu en liam mai theih anih laiin lemziak hi chu en chet chet ngai leh en nawn fo pawha belhchian dawl a ni  a, ngaihtuahna hrang hrang a thlirtu te ah pe chhuak thei anih thu a sawi.

 Pu Laltanpuia  Vice President MADS Art Exhibition   kaihhruaitu chuan vawiin 6th November atanga 9th November,2018 thlengin, zing dar 10 atanga tlai lam dar 5 thlenga  Exhibition hi en leh lei theih tura  hawn anih thu  a sawi a. Pu V Lalzawmkima,General Secretary MADS hnen atangin report ngaihthlak niin Pu V Laltlanmawia,Treasurer MADS in kalkhawm te hnenah lawmthu a sawi a ni.

MADS  te hi 6th November,2012  a din tan aniin MUP Building Khatla, near City Park ah hian Office an nei a. Kum tin Outdoor Study  te, Workshop te,Exhibition te leh Naupang pual intihsiakna te an nei thin a ni.