Vawiin khan Mizoram Arts Development Society leh Mizoram Film Development Society te chu anmahni enkawltu Information & Public Relations Department ten kawmin hma thar lak dan tur an relpui.

Director Pu Jim K. Chozah office chamber ah inkawmhona tha tak neih paha hmalak chhoh dan tur hi sawiho a ni a. Pu Jim chuan, heng pawl pahnihte hian langsar tak taka mite hriat tham khawpa hma thar tamtak an lak tawh thin avanga a lawmthu a sawi a. Sawrkar atanga Budget awm ang apiangte a bo a bang awm lova lemziakmite leh Film siamtute tana hman thin chuan rah duhawm tak tak a chhuah thin hi ka lawm takzet a ni, a ti a ni.

Pi Lalnithangi, Joint Director pawhin thu sawiin heng pawl pahnih MADS leh MFDS te nena an thawh honaah hian a lawm fo thin thu a sawi a, kawng engkimah inpawh tlang taka thalai engemaw zat talent nei tha tak takte pho chhuak tura ke an pen thinna chuan rah duhawm tak a chhuah teuh tawh a ni, a ti a. Department chuan heng pawl pahniha mi bik intelkhawmte hi a chher chho sauh sauh dawn a ni, a ti a ni.

Pawl pahnihte tana hmachhawp an duante zingah khua tuihul chhoh veleha Art Workshop neih te, Film Piracy chungchang zirho te, Actor training buatsaih leh National Films Development Corporation (NFDC) nen tanghova Workshop neihte a tel a. Hengte hi la thlir ho leha a eng ber nge tih hmasak tur an la rel leh dawn a ni.