Mizoram Sawrkar chuan ram hmasawnna chak zawka kalpui zel anih theih nana ruahmanna hrang hrang a siam te zinga pawimawh tak pakhat ram pawn leh ram chhunga sumdawng lian te koh luh a private investment tam zawk chawlut tura inrawnkhawmna hun “Magnetic Mizoram Investors’ Summit” chu naktuk April ni 20 leh naktip April ni 21 hian Berawtlang Tourism Convention Centre, Aizawl ah a buatsaih dawn.
He Magnetic Mizoram Investors’ Summit hian a tum ber chu tun dinhmun atanga dinhmun tha lehzuala inhlangkai tura Sawrkar leh mipuite tanrual tir a, rahbi thar kai tura ke pen tlan tir ani a, tun tuma Investors Summit Aizawla nghah anih hma hian ramdang a cheng ten Mizoram an hmelhriat theih nan India ram khawpui lian pathum Mumbai, Delhi leh Kolkata ah te Road Show hlawhtling taka buatsaih a ni tawh a; heng atang te hian rampawn leh ram chhung ami ten Mizoram an ngaihven in an hmelhriat phah a, naktuka Investors’ Summit neih turah pawh hian khawvel hmun hrang hrang leh India ram chhung hmun hrang hrang atangin mipawimawh leh ropui tak tak rawn kalin Mizoram hmasawnna tur atana pawimawh leh tangkai te an rawn zirchiang dawn a ni.
He Magnetic Mizoram Investors’ Summit ah hian Mizoram pawn atang mipawimawh thahnem tak an rawn kal dawn a, heng zingah hian Jitendra Kumar, Adviser NITI Aayog, Naveen Verma, secretary DoNER Ministry, Dr. Michael Feiner, Consul-General Germany, Dr. Mikhail Gusav, Dy. Consul-General, Russia, Dhiraj Pratap, CEO, Cloudsteer Technology Singapore, Dr. Tomasz Gerlach, Director, Polish Institute, Anurita Jha, Actor& Filmmaker, Shahnab Alam, Filmmaker, Nivedita Mehra, Managing Director, US-India Strategic Partnership Forum, Raveendra Desai, CEO Airtel te bakah mi pawi,awh leh mithiam thahnem takin he intawhkhawmna hi an rawn chhim dawn bakah anmahni hi biak rawn theih an ni dawn bawk a ni.
He nihnih awh tur Mizoram puala intawhkhawmna chhim tur hian Mizoram Sawrkar chuan mi zawng zawng a sawm a ni.
