No.1689/2020-2021

Nizan (04.06.2020) khan COVID-19 hrileng avanga Maharastra-a tangkhang mi 39 (Hmeichhia 28 leh Mipa 11) ten Khawzawl an thleng leh a, Zuchhip field-a screening point ah Khawzawl Bawrhsap Pu H. Lianzela, Khawzawl SP Pu P.C Lalchunglura leh Medical team te bakah Manangement Zone hrang hrang-a Zonal officer-te leh Care taker ten an lo dawng sawng ani.

Lo thlengtharte lo lawmna inkhawm tawiah hian District Bawrhsap chuan hrileng vanga lo haw te chu thinlung taka Khawzawl mipui ten kan lo lawm thu te, zin kawng thui leh hahthlak tak an rawn zawh chung pawha thuawih taka an awm avang a lawmawm a tih thu te a sawi a. Khunghran an nih chhunga sawrkarin tihtur leh tih loh tur a zam te zawm tur te, an hunawl Pathian pawlna atan leh an chhehvel vawnfaina hun atan hmang tangkai turin a fuih bawk. Lo thlengthar te hi Dinthar Pastor bial vawngtu Rev John F. Lalhmingliana'n Pathian hnenah a tawngtai sak bawk ani.

Lo thleng tharte hi Pune atanga rawn haw mi 21 leh Mumbai atanga rawn haw mi 18 an ni a, an zingah hian nausen thla 11 mi pawh a tel. Dan anga an hriselna endik sak an nih hnuah khung hranna tura ruatsa Presbyterian English School Khawzawl Vengthar, Govt. Khawzawl College, Residential Special Training Centre leh Tourist Lodge-ah te dah luh nghal an ni.Hetih lai hian Aiduzawl MNF Party leh MHIP te chuan Quarantine Facility Centre a awmte tan Antam, thingthupui , khanghu etc thahnem tak an rawn pe bawk a ni.

Tun dinhmunah Khawzawl District chhungah hian Covid 19 hrileng avanga Quarantine Centre leh Isolation Centre-a khung hran mi 191an awm mek a ni.