Art & Culture Minister Pu P.C. Zoram Sangliana chuan tunlai hian Mizo hnam hnahthlak hrang hrang te zingah hnam a chian pawimawhzia kan uar sawt ta hle a, hnam ah kan in chian siak mek lai hian a pawimawh zawk fo erawh chu mahni hnam ro thil, pi pu sulhnu leh rohlu humhalh a vawn that nachang hriat hi a ni.

He thu hi vawiin a “Hnamte Tobul” tih lehkhabu I&PR Auditorium a inkhawm buatsaih ah a tlangzarh tum a a sawi a ni a. Minister chuan Art & Culture Department hian pi pu sulhnu leh ro thil humhalhna turin Cultural Heritage Programme lian tham tak a bawhzui mek a. Amaherawhchu heng hmalakna kalpui mek lai hian khaw hmun leh thil dang ah hre zawk ni a inngai ten thu dang hla dang an neih thin avangin duh angin ruahmanna kalpui chak theih a ni lo fo chu thil pawi tak a ni a ti.Hnamte Chhungkaw Hotu Committee ten anmahni hnam bil tobul chhuia a bu hial a an buatsaih hlawhtlin thei chu a lawmpui thu sawiin he lehkhabu hi Mizo History puitu tangkai tak a ni ngei ang a ti.

Phek 124 a chah bung 16 awm Brig. Sapliana, H. Vanthuama leh Lalengliana te kut hnu Hnamte Tobul chhui bing na lehkhabu hi Aizawl khawpuia Hnamte Chhungkaw Hotu Committee in ti ten a bu ah siamin vawiin hian tlangzarh a ni a, bu 1 Rs. 70/- zel a hralh tur, a bu chhung thu thlir zauna hun B. Lalthangliana’n hmangin kalkhawm ten a bu chhung chanchin huam zau takin an sawi hlawm.