Chawlhkar khat zet Champhai lama a inzin hnu in Taxation Minister Pu J. H.Rothuama chuan Aizawl a lo thleng leh ta.
Champhai a zinna ah hian Tuipui, Mualkawi, Melbuk, Zokhawthar, Dinthar, Zotlang, Chhungte, Kelkang leh Dilkawn te tlawhin khawtlang hruaitu leh sorkar mi pawimawh te nen vantlang mamawh thil hrang hrang leh hmasawnna kalpui mek te a enkual a. Minister hian Kanan Veng a BNRGSK Building a hawng a, New Champhai a Helipad siamna hmun tur a en bawk. Heng khua leh veng hrang hrang a tlawhna ah te hian Minister chuan tunhnaia Europe ram thenkhata chhiah an lak dan leh mipuite tana an hman tangkai let dan zir chiang a a zuk zin thu sawi chhuak in Mizote pawh hian chhiah pek kan thiam sawtin uar deuh deuh tura inzirtira tulzia a sawi a ni.
Revenue Minister ni bawk Pu J.H. Rothuama chuan leilung humhalh pawimawh dan sawiin Aizawl a Revenue Directorate dawr pah ve lo te tan pawh an harsatna leh mamawh ngaithla tura zin chhuak a nih dan a tarlang a. Mizoram sorkar programme pui ber NLUP thawhhnihna pawh buatsaih mek a nih dan sawiin hei hi rethei dawm chhuakna tur leh ei zawnna ngelnghet dinna tur a nih ang ngeiin NLUP dawng tawh te pawh an tu leh fate thlenga rotling siam nan hmang turin a fuih a ni.
