Ni 23.2.2019 (Inrinni) khan Kolkata Mizoram House Ballygunge-ah Chapchar Kut hman a ni a. School Education Minister Pu Lalchhandama Ralte chu ‘Kut Pa’ a ni.
       
Pu Lalchhandama Ralte chuan Chapchar Kutah hian thusawiin mahni hnamzia theihnghilh reng reng hi hnam boralzia a ni a ti a. Mimal pawh mahni hnamzia bosal apiangte hi mi boral kawngzawh an ni a ti. Minister chuan Chapchar kut hi Mizo hnam kan inpho chhuah ve na a ni a, hnamdang kara awmte tan tan lak zel tul a ni a ti a . Kolkata a awm te chu Mizo nihna leh Kristianna vawng nung tlat a, Missionary an ni tih hre reng turin a chah a. Kristian chu kan awmna apiangah kan danglam bik tur a ni tih sawiin hnamdang karah Mizo aiawh nihna leh Kristian aiawh nihna hre reng turin a chah a ni.
         
Minister chuan kan sakhuana vawng nung a, Kohhranten Pathian kan biakna ngaipawimawh a, inkhawm thin turte, welfare thiltihnaah pawh phak ang tawka mawhphurhna hlen thin turin a fuih bawk. Zirlaite chu kan ram mamawh chhanna ni turin a fuih a, Civil service a lut kan Mizo rual u te an liam zel a, hnamdangin post pawimawh an luah mek a, chuvangin ram mamawh chhanna ni turin a sawm a. ‘Hnamin a mamawh a che u, hnamin a ko a che u, tang rawh u, in tithei a ni’ tiin zirlaite chu a fuih a ni.
     
Kolkata-ah hian Mizo 1000 bawr vel an awm a, kum 40 kal ta atang khan Chapchar Kut hi hlim takin an hmangho thin a ni.
      
Kolkata Mizo Welfare Association ten Chapchar kut an hmannaah hian Pu Laima Chozah IAS chu chairman a ni a, Kolkata a Mizo awmte thahnem tak an tel a. Kut pa Pu Lalchhandama Ralte hi School Education  Officer thenkhatten an tawiawm a ni. Chapchar kutah hian zaithiam te an zai a, kut hmangtute hi a huhovin  an chai a, an chheih lam bawk a, tlaiah ruai an theh bawk a ni.