District chhunga Central sawrkar sum hmanga hmasawnna hnathawh hrang hrangte enkawltu Committee, Serchhip District Development Co-Ordination & Monitoring Committee chu vawiin hian an Chairman Pu CL Ruala, MP (LS) leh Co- Chairman Pu Ronald Sapa Tlau, MP (RS) te hovin an thukhawm a.  Hmalakna hrang hrangte an thlirlet.

Chairman Pu CL Ruala chuan, kum sawm chhung zet DDCMC Chairman a nihna chu a lo tawp dawn tak thu leh tun tuma mi hi a hova an thutkhawm hnuhnung ber a nih tur thu a sawi a. Thahnemngaihna a vanga DDCMC member Officers te chungah tawngkam mawi lo deuh te a lo hmanga, an rilrute a lo tina palh a nih chuan ngaihdam a dil a. Kum sawm chhung zet tha taka an lo thawhpui tawhnaah lawmthu te hrilhin inthlahna thu a sawi a. Sawrkarin hmasawnna hnathawk turin nangni lo chu kutke dang a nei chuang lova, in pawimawh em em ani, tiin DDCMC members kalkhawmte a chah a ni.  Pu Ronald Sapa Tlau pawhin Chairman Pu CL Ruala thlahna thu hi a sawi ve bawk a, hruaitu viak tha leh taima tak, Mizoram tana thil tha tam tak lo titawhtu, District Council hunlai ata vawiin thlenga tha tho taka ram tana beitu a ni, a ti a. Amah thlah nan hian members kal kawm ten kut an beng a ni. 

He Meeting ah hian kum 2018 June thla atanga February, 2019 inkara sawrkar laipui sum hmanga hnathawh te report ngaihthlak a ni a. A langsar zualte chu; tun Financial Year chhungin ni za inhlawhna atangin mipuiten ni 85 inhlawhna an hmu tawh a. Financial Year tawp hmain la hmuh belh beisei a ni. PMGSY hmanga District chhunga inkalpawhna kawng siam mek pakua (9) zinga pahnih chu zawh fel thuak an ni tawh a, a dang panga chu za zela 60 – 85 inkar vel zawh tawh niin tun hnai maiah hna thar neih belh Chekawn – Sialsir leh Khawlailung – Piler kawngte pawh thawh tan leh tawh an ni. RGGVY hnuaia hnathawh khaw 18 zinga khaw 15 chu zawh fel vek tawh an ni a. Khaw pathum Chhingchhip, Hmuntha leh Thentlangah te thawh zawh tawh hnu, Contractor ten an la enkawl lai sia leiminin a tihchhiat te chauh hmabakin an la awm rih a. Hei pawh hi reiloteah zawh theih beisei a ni. Tin, DDUGJY atanga Tuichang a hnathawh te, Integrated Power Development Scheme (IPDS) atanga Thenzawla hmalakna hrang hrang te, SAUBAGYA atanga Maicham Project Division hnuaia hmalakna te pawh zawh fel vek tawh an ni.

National Health Missions report-ah chuan, 2018 – 19 chhunga IMR hi 10.02 ani a, naupiang hi 798 niin an zinga 8 hi an boral a ni. Naupang kum 5 hnuai lam boral zat hi 10 an ni a, Child Death rate hi 12.5 a ni a, Neonatal Death hi (ni 28 aia sen) 5 ani. He hun chhunga MSACS Test Report-ah  HIV Test hi General Population bikah Serchhip ah mi 1504 test an ni a, chung zinga 35 chu Positive an ni, raipuar mi 43 test an ni a, an zinga 7 chu Positive an ni. Thenzawl ah General Population 297 test an ni a, an zinga mi 4 chu Positive an ni a, raipuar mi 237 test zingah mi 4 an Positive bawk.  DDCMC Chairman Pu CL Ruala chuan, HIV Positive Mizoramah kan tam lutuk chu manganthlak a tih thusawiin, kohhran tinte chu nasa zawka HIV/AIDS venna lama hmala turin a ngen a. He natna kan thalaiten an kaina lian ber chu mipat hmeichhiatna (Sex) a ni a, inzirtir nasat a tul tak zet a ni, a ti.

Hengte bakah hian NRLM te, NULM te, Swachh Bharat Missions leh National Rural Drinking Water Programme te, BADP te, Ujjwala Yojana te, Social Welfare hnuaia hmalakna te, IWMP/PMKSY te, SSA leh RMSA te leh hmalakna dang tam tak sawiho a ni.

He hunah hian Pu Lalduhoma, MLA te, Pu VL Remliana, Project Director, DRDA te leh DDCMC members dangte an tel a ni.