Department of Industrial Policy & Promotion, Govt of India leh Mizoram Sawrkar tangkawp in a buatsaih, "Start-Up India Mizoram Yatra" chu vawiin chawhma dar 10:00 khan Transport Minister TJ Lalnuntluanga’n hawngin Secretariat Office tual atangin Start-Up Yatra Van a vailiam nghal.

Start-Up India Mizoram Yatra hawnna hunah hian thu sawiin Planning Minister chuan Mizoram Sawrkar hnuaia ei leh bar, sum dehchhuah leh eizawnna (economy) changtlung leh tlo zawk Mizoram-in a lo neih theihna tura hmalakna pawimawh tak pakhat chu Entrepreneurship development hi a ni a ti a. Entrepreneurship ah chuan Thiamna bituk (qualification/eligibility) a ngai ve lova, kum bithliah a awm lova, hnathawh hunbi a awm ve lova, A thawk tam leh remhria apiang dinchhuahna, a taima leh hmangchang hria apiang hausakna a ni a ti a. Kan ramah hian thawk lova sum hmuh duhna leh tlemte thawha vawi khata hlawk phut duhna rilru alo lian ta hle a. Thingtlang kilkhawr ber atanga khawpui thlengin chu rilru chuan min eiral mek a. Mipui sukthlek thlakthleng a, Bible zirtirna dik tak taimak, thawhrim leh thawh rah seng kan inzirtir a ngai ta a ni tiin Entrepreneurship chu hmasawnna khawlpui “engine of growth” a nih avangin  hnathawh tur neihloh vanga harsatna (unemployment problems) lak ata min chhanchhuak theitu a ni a. Hei hian mihausa leh retheite inkar zau ta lutuk hi a tizim thei a, khawpui leh thingtlang inthlau ta lutuk pawh hi engemaw chen chu a ti bo theiin hmasawnna pawh rualkhai takin a  thlentir thei ani a ti bawk.

Minister chuan Mizoram Chief Minister Pu Zoramthanga pawhin Start-Up India Mizoram Yatra hi a ngaipawimawhin a hlawhtlin ngei theih nan duhsakna a hlan a ni a ti a, thalai taima, tumruh leh a ngaihna hria ten sawrkar behchhan lova mahni kut leh ke a an dinchhuah phah ngei a beisei thu sawiin hausa fa te ringawt an lian chho leh thin hi a veiawmin mi tumruh leh taima te tan hlawhtlinna kawng a inhawng ve reng tho ani tih beiseina tinung thar tu atan he programme hi chhawr tangkai nise a duhthu a sawi a, lian tur chuan te tak te atanga in din chhoh a ngai fo thin a, he programme hi a duang tuten an tum ang tak a, nakina la dingchhuak tur te hailanna a nih ngei a beisei thu sawiin duhsakna a hlan a ni.

Start up Yatra hian a tum ber chu entrepreneurship lama awareness pek leh zirlai, hetiang lama tui mi te competition hmang a hmasawn thei tur a chher chhuah hi a ni a, Minister-in a vailiam tak  ‘highly-equipped Start-Up Yatra Van”  hian Mizoram khawpui hrang hrang tlawh kual in, School leh College thlan bikah kalkual in zirlai leh helama tui mi te a khawn khawm ang a, Start-up India kalphung hrilh fiahna leh he competition a tel dante a sawifiah anga, a dinna hmunah hian competition a tel duh te tan registration a tih nghal theih dawn ani. Van in a tlawh tura ruahman chin a tlawh kual hnuah Aizawl leh Lunglei ah Boot Camp neih a ni ang a. Boot camp ah hian intihsiakna buatsaih in, certificate leh cash prize tha tak tak te category chi hrang hrangah siam a ni bawk ang.