1995/2024-2025

Aizawl the 10th September, 2024 : Mahni intihhlumna hluar zel laka invenna leh inzirtirna ni 'World Suicide Prevention Day' chu National Mental Health Programme bultumin vawiin khan DHME Auditorium-ah hman a ni.

He hun hmanpuitu Pi Lalnunmawii Ralte, Jt. Secretary, Health & Family Welfare chuan thusawiin mahni intihhlum duhna hi nasa takin Mizoramah a hluar chho mek zel a. He ngaihtuahna hi rilru lam natnain a hrinchhuah a ni tih kan hriat chian a, kan bula awm, kan chenpuite emaw, kan ṭhian leh lam hlaa awm pawh ni se, an chetzia leh khawsak phungah danglamna a awm em tih kan thlithlai ngun a pawimawh a ti. Hetiang thil duhawmli tak a thlen loh nan rilru suk thlekte a êng zawnga her rema, harsatna tawhte hnehtu ni thei tura intih chhel a ngai a ni a ti.

Vawiina World Suicide Prevention Day puala hun hman hi Dr. Vanlalfela, Additional Director, PD Office in a kaihruai a. Pu Vanneihtluanga, President, ARDSI Mizoram chuan thusawiin Mizorama mahni intihhlumna thleng ṭhin chungchang leh a kaihhnawih hrang hrang te, a ven dan leh Mizo khawtlanga thil thleng tlanglawn tak a nih tak avanga a veng thei tura inher remdan tur ngaihtuah a ngai a ni. Pu Rahul Alwal, SP Aizawl pawhin thusawiin kum 10 chhunga Mizorama chhunga mahni intihhlumna thlen dan leh a chhan hrang hrangte tarlangin report a pe bawk.

Anni bakah hian Dr. Ruth Lalmuanpuii, Joint Director, Prof. HK Laldinpuii Fente, Gen. Secy., ARDSI ten kalkhawmte hnenah mahni intihhlumna thlen dan leh a kaihhnawih hrang hrang zirchianna ngaihnawm takin an sawi bawk.

Pu Rahul Alwal, SP Aizawl report aṭanga a lan danin Mizoramah hian kum 2014 atanga kum 2024 (July) thla thleng khan mahni intihlum mi 948 awmin chung zinga mi 794 te chu mipa an ni a; mi 154 te chu hmeichhia an ni thung. Data-in a tarlan danin mahni intihhlumna hi kum 20-39 inkarah a tam ber a, mi 584 an ni. A dawtah kum 40-69 inkarah mi 201 awmin kum 1 – 19 inkarah mi 117 an awm bawk a; kum 60 chung lamah hian mi 41 an awm bawk. Kumin bikah hian mahni intihhlumna hi tum 49 a thleng tawh a ni. Zirchianna in a tarlan danin mahni intihhlum percentage hi mipa 84% niin hmeichhia 16% an ni. Mizoramah hian kum 9 atanga kum 90 thlengin mahni intihhlumna hi a thleng ni a chhut a ni bawk.

Mahni intihhlum tum mi beidawngte lo dawngsawnga, an harsatna leh buaina ngaihthlaksak tura Helpline pawimawh tak TeleMANAS chungchang pawh he hunah hian tarlan niin TeleMANAS helpline no. 14416 leh 18008914416 hmanga Counsellor leh thawktu dangte englai pawha biak pawh theih an ni. Tin, anni bakah hian ARDSI Mizoram Helpline7005983633 leh 9366191341 ah te pawh biak theih reng a ni bawk.

Vawiina World Suicide Prevention Day-ah hian Mizoram College of Nursing, RIPANS zirlaite bakah Kulikawn Hospital Psychiatry Department bakah  Department Officials kal an tha hle a. Dr. Robert L. Khawlhring, State Nodal Officer DHME-in lawmthu sawiin hun hnung a khar a ni.