Research Extension Centre, Central Silk Board, Aizawl leh Champhai District Project Sericulture Office tangkawp chuan Integrated Bivoltine Sericulture Development Project hnuaiah a vawikhatna atan Champhai leh achhehvela maimaw pangang khawitute hnenah ni hnih chhun zirtirna an pe. Training hi vawiin khan Hmunhmeltha YMA Hall-ah Hmunhmeltha leh North Khawbung atanga maimaw pangang khawitu mi 40 hnenah pek a ni a. Nimin (22.10.2015) khan Bethel Comunity Hall-ah zirtirna hi neih a ni tawh bawk.

Training hi Pu Lalthankima, District Sericulture Officer Champhai chuan kaihruaiin, Pu BN Choudhury, Scientist-D, Research Extension Centre, Central Silk Board chuan North-Eastern Region Textiles Promotion Scheme hnuaia he project kalphung leh Sericulture hmalakna te a sawi a. Resource Person a ruat Dr. Lalthlamuana Pachuau, Scientist-C, REC, Aizawl; Pi Lallawmzuali Extension Officer DSO, Champhai; Pi Laldinpuii, Deputy Project Director, ATMA leh Pu Vanlaldinga, Attender REC Aizawl ten maimaw pangang khawi dan kimchang farmers-te an zirtir bawk. He hunah hian Farmers te zawhna leh chhanna hun hman a ni.