Vawiin khan Student Self Support Union (SSU) General Assembly vawi 30-na, ni hnih ni chu Lal Thanhawla Auditorium-ah UD&PA Minister Pu Zodintluanga’n a hmanpui.

Pu Zodintluanga chuan thalai nih chhung hi hun rei lo te a ni a, he hun rei lo te hi hman that leh fimkhurpui a ngai hle a ni, a ti a. Chhungte thawhchhuah ringa changkang taka khawsak tum, mobile phone changkang hum tum tlat rilru hi paih a ngai a, zirlaite kawng tha zawk kawhhmuh turin SSU an pawimawh a ni, a ti. UD&PA Minister chuan Zofaten hmasawn dan dik kan zir chhuah loh chuan kan hniam telh telh dawna, mahni theihna zawn theuhah hma la a, kan tan tlana, kan inpuih tawn erawh chuan kan ram tan kawl a eng hle a ni, a ti a. Nakin lawka ram hruaitu la ni tur tuna zirlaite thinglungah mahni intodelh tumna leh hlutna tuhngheh a tul a ni, a ti bawk. Minister chuan dan leh thupek zawm that a pawimawhzia sawiin dan zawm thatna ram apiangah mihring an zalen a, zalen kan duh chuan keini pawhin dan kan zawm a tul a ni, a ti a. Mizoten roreltute leh dan kengkawhtute nghak hman lova chet rum rum kan ching hian zir tur kan la ngah zia a ti lang a ni, a ti. Mahni hmazawna thil awm hmachhawn ngam tur leh mahni mamawh su chhuak ngam turin a tul hunah zah loh theih a pawimawh tih hre turte, saptawng pawh zak lova hmang ngam turte leh kan ram chhunga hnathawh tur awmte hnam dang kuta dahlova mahni ngeiin thawh nachang hre turin Pu Zodintluanga chuan zirlai kalkhawmte a fuih a. Kan ram hi ram nuama siam tur chuan keimahni kutah a innghat a ni, a ti.

SSU member zinga mahni intodelh Self-Support Award 2015 chu khuallian hian a hlan a. Award dawngthei tura chhawpchhuah mi 17 zingah pathum thlanchhuah a niin MJA President Pu Vanlalrema Vantawl chu endiktu a ni. Chawimawina dawngtute chu Zaithanmawia, Johnson College; Lalchhuanzela, Pachhunga University College leh PC Lalawmpuia, Govt. KM Higher Sec. School te an ni a. Pakhatna atanga pathumna siam lovin award dawng thei pathumte hi tehna hrang hranga intluktlang an ni.

Student Self Support Union (SSU) General Assembly ni hnih ni, chawhma lam programme hi an Secretary General PC Lalramengmawia’n a kaihruai a. Jt.Secretary B.Lalrohlua’n an pawl chetvel dan tlangpui a report a, President James Ramdinmawia’n thu a sawi a ni. Chawhnu lamah Kut Pa Pu C.Zorammuana, MPSC Member hovin Vangpui Kut an hmang bawk.