Vawiin khan Mizo Academy of Letters din champhaphak vawi 49-na lawmna leh MAL Book of the Year 2012 lawmman hlanna inkhawm MBSE Conference Hall Chaltlangah neih a ni a, Parliamentary Secretary to CM Pu Lal Thanzara chu khuallian a ni.
Pu Lal Thanzara chuan thu leh hla lama mi thiam leh miril intelkhawmna pawl Mizo Academy of Letters-in ngaihtuahna nasa tak senga thu leh hla lama Mizote’n hma kan sawn theihna tura an hmalakna te a fak a. Mizo hnam naupang tak hian thangthar lo awm zel tur tan an nihna (identity) an hriat zel theih nana kaihhruai te; hmanlai Mizo thu leh hla, thangtharte chhiar theih tura vawn that te leh Information Technology khawvela cheng, lehkhabu chhiar na chang hre tawhlo thalai tam tak zingah lehkhabu chhiar chakna chawk tho tura thahnemngai taka tan lak zel chu MAL kovah a innghat, a ti. Ram pawna Mizo thisen zawmpuite tamna Myanmar leh Manipur ramte atanga affiliated club-Christian Literature Club leh Manipur Literature Society an neih te hian thu leh hla lama hmasawnna piahlamah Mizote inpumkhatna siamtu tha tak nia a hriat thu te bakah Tripura leh West Bengal lam a thu leh hla tui mite nen thawhhona an nei te hian hnam dangte nen pawha inpumkhatna tha a siam ni-a a hriat thu Parliamentary Secretary hian a sawi bawk.
Pu Lal Thanzara hian Mizo Academy of Letters Book of the Year 2012 atana thlan “Sihlipui” ziaktu Romuanpuii Zadeng, Khawzawl hnenah chawimawina thuchei leh sumfai cheng 5000 a hlan a, Lalzuia Colney lehkhabu “Westminster Abbey Thuinchhang” chu a tlangzarh nghal bawk. 2012 Book of the Year lawmman tangkafai hi Pu R.V Lalmawia, Chaltlang chuan a tum a ni.
Inkhawm hi MAL President Pu Lalthangfala Sailo chuan a kaihruai a, MAL Secretary Pu Rualkhuma Colney chuan MAL hmalakna tlangpui a sawi a, Book of the Year 2012 Secretary Pu Lalnunzira pawhin 2012 chhunga Mizo lehkhabu chhuak zinga tha ber thlan dan tlangpui a sawi bawk. 2012 chhung khan Mizo irawm chhuak lehkhabu 135 a chhuak a ni.
Tun hnaia rampum huap chawimawina sang Padma Shree dawngtu Pu J Malsawma pawh vawiinah hian a lo tel ve a ni.
