Vawiin chawhma dar 11:00 khan HPC Cup vawi -3na ,Lunglei District chhunga village council team 67 te inelna tur chu Thuamluaia Mual,Lunglei-ah Pu S. Laldingliana, Parliamentary Secretary in a hawng a. Hawnna inkhawm Lunglei Bawrhsap Pu V. Sapchhunga kaihhruai ah hian HPC Vice-Chairman Pu Joseph Lalhimpuia pawh a tel a ni.

Pu S. Laldingliana, Parliamentary Secretary chuan Chief Minister infiammi leh Sports Minister,infiamna ngaina tak leh Sports tih hmasawnna tur atana hma la thei leh a ngaihna hria kan neih avangin Mizoram chu India mai ni lo, International sports map ah kan chuang tan tawh a ni, a ti a. Mizoram chuan N.E States dang ngaihsan khawpa hlawhtling N.E Games a thleng tawh a. Kan hmabak leh kan thil tum dang chu National games thlen a ni, a ti. National games thleng thei tur hian infiamna khelmual leh hmun te, infiammi te tih hmasawnna bakah a sports policy thlengin sawrkarin tih tak zet in ngaihtuahna a seng a , hma a la mek zel a ni, a ti a. Sawrkar hmalakna leh phurna te hian thalai infiammite tan chona nasa tak a siam a.Chu chu infiammite Mizoram leh India khawvel a ti hming tha thei turin an chhan theih a ngai a ni, a ti.

Vawiin programme a report tawi pe tu Pu J.Vansangzuala, DS &YO chuan he tournament senso a atan Lunglei HPC chuan Rs.5.5 lakhs a sen thu a sawi a. He tournament hi vawiin 23/4/2013 atanga intan in 17/5/2013 ah Final khelh a ni ang. HPC Cup hi Lunglei District Football Association(LDFA) official ten knock Out system hmangin an kaihruai dawn a . Vawiin match hmasaber ah Thehlep VC team leh Sekhum VC team te an inkhel a ni.