Natioanal Buildings Construction Corporation Limited (NBCC) Mizoram State chuan Champhai District Hospital hman tur Ambulance cum Morgue Van, M/s Maruti Susuki siam EECO a thlawnin a pe a, Champhai DC (Charge la mektu) Addl. DC Pu Zoengsanga'n he thil pek hi vawiin khan lawm takin a dawng.

Hlanna hun hi Champhai DC Conference Hall-ah neih a niin, NBCC aiawhin Deputy General Manager Er. RK Singh (Mizoram State) in hlanna a nei a, he hunah hian Champhai District CMO C. Zirliana leh Hospital Superintendent Dr. Lalbiaktluangi te bakah District Hospital a thawktuten an tawiawm.

Er. RK Singh Deputy General Manager (NBCC Ltd) chuan Mizoram-ah hmasawnna hna thahnem tak an thawh thu leh Champhai Khawpui chhungah pawh Chanem Building an sak bakah anmahni kal tlangin khawpui chhung hmasawnna hna Rs 23 Crores chuang man an thawh thu tarlangin, an hnathawhna kawngah mipuite nen thawhhona tha tak an neih vangin lawmthu a sawi a, District mipuite harsatna sukiang tur leh an mamawh chhawk zangkhai nan EECO Ambulance cum Morgue Van hi pek anih thu a sawi bawk.

Addl. DC Pu Zoengsanga chuan NBCC Ltd in Champhai hmasawnna tura hna an thawhte chu lawmawm atih thu leh an hnathawhte pawh tha thawkhat anih rualin, hmun thenkhat a hnathawh erawh sawisel kai deuh a awm thung a, NBCC Ltd. in khawpui hmasawnna tur hnalian an thawh hunah chuan tha leh zual a thawk turin a sawm bawk.

District Hospital tana NBCC in Ambulance a pek hi Rs 4,30,000.00 man a ni a, lirthei a tih tur tulte tihfel vek tawh niin,hmanzui nghal theih a peih a ni. District Hospital hian Ambulance cum Morgue Van pakhat a kawl mek a, a thar neih belh anih takah hian Damlo phurh nan leh Mitthi ruang phurhna tur bik ruahman fel anih tur thu Hospital a thuneitute hnen atangin dawn a ni.