Vawiin khan Mizo Academy of Letter (MAL) chuan an dinchampha phak vawi 52 na I&PR Auditorium-ah an lawm a, he hun hi Art & Culture Minister Pu R.Romawia’n a hmanpui a ni.

Khuallian chuan MZP leh MAL te thahnemngaihna zarah nasa takin mizo tawng hian hma a sawn a, 8th scheduled a mizo tawng thunluh ve chungchang pawh kan rilruah a riak reng thin a ti a, Mizoram Assembly-ah pawh hian proceeding ah mizo tawng hi a hman theih a, Lok Sabha leh Rajya Sabha-ah pawh proceeding hi kan thawn tel thin a ti.

Tunlai khawvelah mizo tawng hi kan hmang uar ta hle a, chuvang chuan mizo tawng dik zawk nia kan hriat chu hmang tlat zel ila, tawng thluk nei anih avangin chhiar dan dik kan thiam pawh a tul hle tiin MAL pawhin hemi kawngah hian nasa leh zualin tha thawh se a duhthu a sawi. Midangin thiam se kan tih rualin barh luih erawh a hlauhawm hle a, evolution anga midang hneh kan tum tur a ni a ti bawk. A theih chin chinah MAL te chuan thuziak hmangin tan la chho zel tura sawmin Lehkhabu tha a lo chhuah zel hian hmathlir eng takah min hruai zel thei a ni Minister chuan a ti.

Mizo Academy of Letters (MAL) a tel tur hian MAL thil tuma tui leh pawm, thu leh hla lama kutchhuak nei, kum 21 aia naupang lo tan membership fee Rs.300/- pein member anih theih a. A zawna kum 5 member ni tawh chin tan Rs.5,000 /- pein Life Member anih theih a, Rs.50,000 /- pein Donor member anih theih. Annual Membership Fee hi Rs.200/- a ni a, hei hian thu leh hla lak man a keng thung.

Book of the Year 2015 atan ‘Kawlkil piah lam’ tih Pu C.Lalnunchanga ziak chu thlan a ni a, Pu C.Lalnunchanga ziak tho ‘Pasalthate Ni hnuhnung’ tih chu Book of the Year 2006 atan thlan a lo ni tawh bawk a, lawmman hi Khuallian hian a hlan nghal a ni.

MAL Foundation Day lawmna leh Book of the Year hlanna hun hi Pu Lalthangfala Sailo, MAL President in kaihruaiin Pu Darchuailova Renthlei, Fin.Secretary, MAL in lawmthu sawina neiin hun a khar a ni.