Directorate of Science and Technology, Government of Mizoram leh Biodiversity and Nature Conservation Network (BIOCONE) tangkawp chuan ‘Nest Box Kick Off Programme 2016’ chu ni 27 April, 2016 khan Science Centre, Berawtlang-ah an hmang a, hmun remchangah sava bu siamchawp (nest box) an tar nghal.

He Nest Box Kick Off programme-ah hian Chief Scientific Officer Dr. RK Lallianthanga chuan thu sawiin BIOCONE hma lakna avangin lawm thu a sawi a. Mihringte leh thil siam dangte, thil nung leh nung lote in mamawh tawn kan nih dan leh inchhawr tawn dan hriat chianna atanga nungchate dimdawih leh duat a tulzia sawiin , thahnem ngai taka kan inzirtir hi Mizote zingah a la ngai hle a ni, a ti . BIOCONE memberte hma la zel turin a fuih. BIOCONE Senior Adviser Dr. C. Lalhmingliana pawhin thu sawiin sava tangkaina hrang hrangte leh sava humhalh tul ziate leh humhalh tura kan hmalak dan turte a sawi bawk.

He programme hi Dr HT Lalremsanga, Vice President BIOCONE-in a kaihruai a, Dr. Lalrotluanga General Secretay-in report tlangpui a pe a. Department of Science and Technology leh BIOCONE tangkawpte hian kum 2011 atang khan sava bu hi siamin hmun hrang hrangah an tar tawh thin a. Kum 2011 leh 2015 inkar chhungin hmun hrang hrangah savabu 200 an tar tawh a. Kuminah hian sava bu 45 an siam tawh a ni. He hunah hian BIOCONE member te, Science Centre-a thawkte leh Science and Technology Dept. a thawkte an tel.