Vawiin khan Lawngtlai Bawrhsap Office Chamber ah Lawngtlai District Health Society meeting neih a ni a, kumin chhunga Malaria dona kawnga hma lakna hrang hrang thlirhovin hma lak leh zel dan tur ngaihtuah ho a ni.

District Health Society Member Secretary in report a pek danin kumin chhung hian mi 31,263 te thisen endik tawh an ni a, chung zinga mi 410 te chuan Malaria PV veiin a dang mi 5687 ten Malaria PF an vei a, hetih lai hian Malaria avanga nunna chan chu 1 chauh a la awm thung a ni. Lawngtlai District khaw thlanglam hi Malaria Prone Area a nih avangin kum tin in helai biala Malaria vei hmuhchhuah an tam thin a, chutih laiin mipui ten Malaria laka invenna pawimawh tak tak heng, tha taka thosilen zar te, kim taka thosi hlo kah tir te, tuitling thenfai te leh rang taka a thawktute hnena inentir thuah te an la ngaihven tawk loh vang te in Malaria vei an la tam thin ni a hriat a ni a, chutih rualin thawktute thawhrimna avangin Malaria vei hmuhchhuah leh enkawl kawngah hmasawnna tam tak kan hmu ni a hriat a ni.

Kumin hian a thawh khatna March – April chhungin chenna In 17011 ah thosi hlo kah a ni a, a thawh hnihna June – July chhungin chenna In 18643 kah a ni bawk a, Malaria Awareness Campaign vawi 75, Malaria Clinic Cum Awareness Campaign vawi 8 nei ni tawh in tlangau a inzirtirna tum 147 leh Malaria chung chang inhrilhhriatna chi dang vawi 43 neih a ni bawk, hei bakah hian World Vision lam atanga tanpuina in thosilen 5086 damdawia chiah a ni tawh bawk a ni. Hetih lai hian in kalpawhna kawng a that tawk loh avang in tlawhpawh hleih theih loh khua an awm thin a, chu chuan eng emaw chenah harsatna a siam thin thu report a ni bawk.

Chak zawka hma lak a nih theih nan rawtna hrang hrang te siam a ni bawk a, Malaria chung chang inzirtirna (IEC) tuna zirna inah chauh neih thin hi zau zawka kalpui dan ngaihtuah nise, thosi hlo kah dawnah In tinah tha taka kah a nih theih nan BDO leh VC te nena tang hova hmalak nise tih te leh rawtna dang dang siam a ni.

District Health Society meeting hi Chairman Pu J. Hmingthanmawia, District Bawrhsap ni bawk chuana kaihruai a ni.