Vawiin khan Programme for IMCP (Round 9) 13th Quarter Review Meeting chu Health Worker Training School, Conference Hall-ah neih a ni a, Dr. Lalrinliana Sailo, Principal Director, Health & Family Welfare chu Khuallian a ni.
He Quarter Review Meeting hi Dr. C.Zarzoliana, State Prog. Officer (Vector Borne Diseases), Directorate of Health Services in a kaihruaiah hian Khuallian Dr. Lalrinliana Sailo, Principal Director chuan Malaria dona kawnga thawktu te fuihna thu sawiin, Malaria avanga nunna hlu tak chan anih tawh lohnan thawktute chu an mawhphurhna leh dinhmun hrechianga tha thlah hauh lova tan la turin a chah a. Thawktute chu an hna chu Field Work anih anga mahni dawhkan atanga chingfel mailova, mahni bial chhung vawng uluk a, chipchiar taka zirchiang thin turin a chah a ni. Dr. K.Ropari, Director Health Services chuan Health Department in Malaria do-na a kalpui dan te, tanlak zel dan tur leh 2017 thlenga target khum thei tura tan lak a ngaih zia a tarlang a. Dr. Lalzepuii, Dy. Director, (Malaria) chuan Mizorama Malaria dinhmun Power Presentation hmangin a tarlang bawk.
He Meeting-ah hian District hrang hrang atangin District dinhmun report ngaihthlak a ni a, Aizawl leh Lunglei a Medical Officer te hnen atang Sentinel Surveillance Hospital ngaihthlak a ni bawk.
Fur te a lo hnaih chhoh leh tak avangin tunlai hian State Malaria Programme chuan nasa leh zuala tan lak tumin hmachhawp hrang hrang a nei mek a. He Programme hnuaiah hian Mizoram chuan Malaria dona kawngah hma a sawn chho mek zel a. Kum 2006-ah Malaria vanga thi mi 121 lai an awm laiin kum 2013-ah chuan mi 20 chauhin nunna an chan tawh a ni. Kum 2017 ah chuan mihring za zela sawmriat te chu damdawia chiah thosilen hnuaia mut tir hman te, tuna 59% DDT kah pawh 85% a tihsan hman te, malaria vanga nunna chan pawh 16 hnuai lama dah tum a tanlak zel a ni.
He Meeting-ah hian District Malaria Officer, District Programme Officer, Medical Officer, Asst. Malaria Officer, Malaria Inspector leh Malaria Technical Supervisor te an tel a ni.
