Nithum chhunga Sipai Lak Runpui chu tluang takin neih chhunzawm mek zel a ni a, nimin leh vawiin khan Soldier – Technical, Clerk, Keeper leh Nursing Assistant atan intlarna neih a ni. Nimin a mi 775 vel intlar zingah mi 410 te chauhin heng hna atana thiamna bik bithliah an nei a, mi 202 in 1.6 kilometre tlan an paltlang a ni.

Ram pumah heng hna hrang hrang ah hian vacancies 5000 vel a awm a, chutah tanga 500 chu Hmarchhak state hrang hrang te intawm tura dah bik a ni. Tun tum hian intlara la tling chho zel te tan chhunchaw buatsaih a ni a, eitur hi army lamin an tum a, eisiam leh sem chu YMA lamin an buaipui a ni.

Army Recruting Office chuan tluang taka Rally neih a ni theih nan Mizoram Sawrkar leh a hnathawk ten theihtawp chhuah a kawng engkima an puihna chu ropui tiin lawmthu an sawi a, tualchhung mite te hnenah pawh lawmthu an sawi bawk. Tun tuma tling lote chu beidawng mai lova, Rally neih leh hunah an tlin ngei theih nan physical fitness-a tan la turin an fuih bawk. YMA, DDK, AIR, District hrang hranga DC te leh chanchinbu te chungah Rally chungchang tha tak leh zau taka an puanzar sak vangin lawmthu an sawi bawk.

Tarlan tawh angin Soldier General Duty atana intlarna chu nikhat chauh (January ni 15) neih a ni a, hetah hian mi 2500 vel intlar atangin mi 316 te chu an tling chho a, hriselna leh document endik bakah written exam an la hmabak a ni.