Vawiin chawhma dar 10:00 khan Serchhip DC Meeting Room-ah Serchhip District Disaster Management Authority (DDMA) chu an Chairman, District Bawrhsap ni bawk Pi Juhi Mukherjee, IAS hovin an thukhawm a, National Disaster Management Authority, New Delhi te nen a February ni 4 leh ni 5, 2014 a Table Top Exercise leh State-Level Mock Exercise on Earthquake, Serchhip a neih tur chungchang an sawiho a ni.

Tun tuma State-Level Table Top Exercise leh Mock Exercise on Earthquake neih tur hian Mizoram chhim lam a District pali – Serchhip, Lunglei, Lawngtlai leh Saiha te a huam a, hemi hun hmang tur hian heng District pali a District Bawrhsap te leh Superintendent of Police theuh te bakah National Disaster Management Authority, New Delhi atangin Senior Consultant Major General V.K. Datta te, Mizoram Sawrkar aiawhin DM&R Principal Secretary leh ATI hotute bakah Guwahati atangin National Disaster Response Force (NDRF) Team te an rawn tel dawn a ni.

Ruahman lawk dan chuan February ni 4, 2014 hian nilengin Serchhip DC Conference Hall-ah Table Top Exercise neih a ni ang a, hemi hunah hian Chhiatrupna lo thleng thei chi hrang hrangte leh a kaihhnawih thil chi hrang hrang zirho a ni ang a, District Disaster Manage Plan te, Police Disaster Response Plan te, Medical Response, Role of Electricity Department, NGO leh thil pawimawh chi hrang hrangte zirho a ni ang.

February ni 5, 2014 hian Mock Exercise on Earthquake neih ani ang a a hmun atan P&E Venga Leisekawt Field ruahman lawk chin niin Government Serchhip High School leh Higher Secondary School pawh hman tel tur a ni dawn a ni.

Pi Juhi Mukherjee, IAS, Chairman, Serchhip District Disaster Management Authority chuan DDMA member te chu thahnemngai tak leh uluk taka inbuatsaihna kalpui turin a ngen a, Chhiatrupna alo thlen pawha mipui ten chiai lo leh awmze nei zawka an hmachhawn theih nan engkim mumal tak leh a nih dan tur ang taka kalpui a pawimawh thu a sawi bawk a ni.

Table Top Exercise leh State-Level Mock Exercise on Earthquake neih tur atana inbuatsaihna leh ruahmanna te thlir nawn leh turin DDMA hi February ni 27, 2014 ah an thukhawm leh ang.