Rorel tura mipui thlan (Legislators) te puala Malaria chungchanga inrawnkhawmna Advocacy Meeting chu vawiin chawhnu khan I & PR Conference Hall-ah buatsaih a ni a, Mizoram Chief Secretary Pu Vanhela Pachuau in a kaihruai.

Chief Secretary chuan thuhma tawite neiin MLA rual kalkhawmte chu inpawh tak leh sawihreh nei lova Malaria do kawnga an thil hmuh leh ngaihdante sawi turin a sawm a ni.

He zirhonaah hian Health Directorate-a Malaria Programme enkawltute Dr. Lalkailiani, Jt. Director (Mal) leh Dr. Malsawma, Dy. Director (Mal) te chuan Malaria Control Programme kalphungte an sawi a. A bikin kumin 2009 atana April 1 atanga DDT hmanga thosi kah chungchangah khaw hrang hranga Malaria tam dan tehna Annual Parasite Index (API) zulzuia API sanna (API 5 chunglamah) chauh thosi kah anih thu te sawilan a ni. Kum khat chhunga mi 1000 zinga Malaria vei 5 aia tam hmuhna khuate chauh ah DDT hi kah tur a ni.

Vawiina Advocacy Meeting-ah hian MLA te chuan an thil hriatthiam loh leh ngaihmawh zawngte an sawichhuak a, rawtna engemaw zat an siam bawk. Vawiin inkhawmah hian Speaker leh Dy. Speaker, Minister 6, Parliamentary Secretary 3 bakah MLA 9 an tel a. Inkhawm hi Health Director Dr. N. Pallai chuan lawmthu sawiin a tin a ni.