1013/2022-2023
Vawiin khan Lunglei DC Pu Kulothungan A hovin a office chamber-ah Lunglei District-a malaria dinhmun tlangpui leh a do kawnga hmalakna kal mekte sawiho turin meeting neih a ni.

Meeting-ah hian Lunglei District Malaria Officer Dr Lalrinthangi, Zonal Entomologist Dr Zahid Ali Khan leh official dangte an tel a ni.

Lunglei District Task Force on Elimination of Malaria Chairman Pu Kulothungan A chuan malaria tam hun a nih chhoh mek avangin a do kawngah leh mipuite zirtir kawngah ngawrh taka hmalak zel a tul takzet a ni, a ti a. Lunglei District huamchhunga malaria tam na hmun western belt Lungsen, Tlabung, leh a chhehvelah te tan kan lak zual a tula ni tiin mawhphurtute chu hmalak zel dan tur a sawipui.

National Vector Borne Disease Control Programme (NVBDCP), Lunglei District ten malaria do kawnga an hmalakna hrang hrang -awareness program, leaflet sem chhuah, thosilen sem, tui tlinna hmun te siam thata thenfai (source reduction) leh mass testing te malaria season chhungin uar leh zuala kalpui turin Lunglei DC chuan a hriattir a ni.

He meeting thurel angin Lunglei District chhunga hmasawnna hnathawh hrang hrang kalpui mek – kawngpui siam, eletric line siam etc thawktu contractor te pawh an hnuaia hnathawktute thosilen hman tir vek turin hriattir an ni a. Heng thosilen te hi NVBDCP, Lunglei District chuan a thlawnin damdawi a chiah (bed net impregnation) an tih sak theih thu Dr Lalrinthangi chuan a tarlang bawk a ni.

May 2022 khan Lunglei District-ah test 3121 tih tiin malaria case 228 (Malaria Pv – 33 leh Malaria Pf -195) hmuhchhuah an ni.

Vawiin vek khan Lunglei District Malaria Officer Dr Lalrinthangi leh a thawhpuiten Synod Confernce Centre, Salem Vengah Lunglei District huamchhunga ASHA 197 awm te ko khawmin malaria do kawngah training an neih pui a ni. Heng ASHA te hian damdawi leh thisen testna hmanrua hrang hrang te fur tan hma in dawng fel tawhin anmahni area theuh uluk taka lo vil turin hriattir an ni.

A mamawh te tan ASHA te hnenah hian a thlawnin thisen a exam tir theih a. District Hospital, SDH, CHC, PHC, UPHC leh Sub Centre tinah te a thlawnin thisen exam tir theih bawk a ni.