Kumin 2014 chhunga Malaria Do Beihpui thlakna hun hmasa atana inbuatsaihna atan Vawiin February Ni 25, 2014 (thawhlehni) chawhma dar 10:00 khan Directorate Health Services, Dinthar, Aizawl Conference Hall-ah Malaria Dona kawnga thawktu ten PRE-SPRAY MEETING ON IRS OPERATION 1st ROUND an nei a. He Hunah hian Dr. K.Ropari, Director Health Services chu Khuallian a ni.

He Pre-Spray Meeting hi Dr. C.Zarzoliana, State Programme Officer cum Joint Director (Malaria) in a kaihruai a. Dr.Lalremmawii, Dy. Director (Malaria) chuan powerpoint Presentaion hmangin Mizoram chhunga Malaria dinhmun hrang hrangte sawifiahna hun a hmang bawk. He huna thusawitu Dr. K.Ropari, director Health services pawhin fuihna thu sawiin Malaria Dona kawngah thahnemngai  lehzuala thawk turin thawktute a chah a. Malaria chang ni lo, Dengue Fever te leh Chikungunia kan tih ang chi te pawh Mizoramah kan lo hmelhriat ve tak avangin tan lak nasat leh zual a ngaih thu a tarlan bakah hmasawnna duhawm tak nei tura thawktute a duhsak thu a sawi tel bawk.

Kumin 2014 chhunga Malaria Do beihpui thawhkhatna hi March ni 1 atanga tan tur a nih avangin Health Department chuan nasa takin tan a la mek a. Hemi chungchangah hian thu chhuah siamin mipui lam atanga DDT kah chungchanga ngaihdan diklo awm thin chu pawi an tih thu leh DDT hi a kaptu in a damdawi pawlh dan dik tak leh a kah dan tur dik thlapa a kah chuan Mizoram chhunga Malaria hrik pai thosi te hian za a za in an la hua a ni tih ni 46 chhunga zirchianna neih atangin hriatchian a nih thu te. Mahni inchhung kah tir kan hrehna hian thil pawi a thlen leh thin si avangin mipuite lam pawhin rilru zau zawk kan put a ngaih thu te an tarlang a ni.

He Pre Spray Meeting-ah hian District hrang hrang atanga Malaria hnathawktu kalkhawm ten Micro Action Plan 1st round sawihona hun pawimawh tak an hmang bawk a ni.