Mizoram Youth Commission Chairman Pu T.Sangkunga chuan vawiin khan Aizawl Press Club-ah thuthar lakhawmtute kawmin Mizo thalaite hmasawnna tur hmalakna kalpui mek leh a hmachhawpte a tarlang.
Mizoram Youth Commission leh Emporium Training & Consultancy Pvt. Ltd., Kolkata te chuan MoU ziakin Skill Development chungchangah thawhhona thuthlung an siam a. Hemi atana a thawhkhat nan heng course hrang hrang Certificate in – Aviation & Hotel Hospitality Management, Travel & Tourism Management, Retail Management, BPO Training-ah te hian Mizo thalai mi 120 tan a bul tan nan thla 6 chhung a thlawnin training programme, Kolkata-ah a buatsaih dawn a. Advertisement pawh tihchhuah tawh niin ni 14.3.2014 thleng dilna thehluh theih a ni a. Ni 19.3.2014-ah Interview neih tan a ni ang.
April ni 19-20, 2014 hian Mizoram Youth Commission leh Labour, Employment & Industrial Training Deptt. nena tangkawpin buatsaih a ni dawn a. He Skill Fest – 2014, Mizoramah hian India ram hmun hrang hranga Vocational Training Providers (VTPs) tha leh rintlakte an lo tel dawn a. Heng VTP-te hian Vocational Training thalaite an pe a, hna(job) an zawn sak nghal thin a. Chuvangin thalai hna mamawhte chu lo inring tur leh lo inkaua, he Skill Fest-2014, Mizoramah hian hna tha tak an hmuh theih nana lo tel turin MYC chuan a sawm a ni.
International English Language Testing System (IELTS) Centre hi Mizoramin a neih loh avangin Europe, America leh Australia, etc. a zirna sang zawk nei duh ten harsatna an tawk nasa hle a. Hemi atan hian J.J. Aerosport hmangin Centre hawn tum a ni a. IDP, Gurgoan, (Australia ta) hmangin May thla hian Test hmasa ber neih tum a ni a. Mi 200 aia tlem lovin an beih a ngai a, zirlaiten thahnemngai taka he test hi pe ngei turin MYC chuan a sawm a ni.
Mizoram Youth Commission, Army Recruiting Office leh CYMA tangkawp chuan Army Recruiting Rally a buatsaih thin a. Tun 15th April, 2014 pawh hian sipai lak runpui neih leh tur a ni a. Heta intlar turte chuan tun atanga inbuatsaihna hrang hrang, Exercise/ Physical Fitness te nei a, Pre-Recruitment Rally nei lawk turin Mizoram Youth Commission chuan a duh a. Tun sipai lak turah hian Technical Post chi hrang hrang atan Higher Secondary passed chin tan dil theih niin a tling apiang lak mai tur a ni ang.
