Mizoram Legislative Assembly member-te leh Synod Executive Committee member-te chu vawiin khan JM Lloyd Hall, Synod office ah an inkawm a. He inkawmhona programme pawimawh tak hi Synod Moderator Rev.K.Lalhmuchhuaka’n a kaihruai a ni.

Chief Minister Pu Lal Thanhawla chuan politics leh kohhran hi ringtute zingah chuan lak hran theih a ni lova, inpuitawn leh inchawmtawna kal tur an ni, a ti. Politics inlumlet a dikloh chuan kohhran tan pawh kal a harsa a, politics hian ram hmasawnna, remna leh muanna, ei leh bar zawnna kawng tinreng bakah kohhran leh khawtlang nun thlengin a nghawng vek a ni, a ti. Pathian zawn chhuah hnam inti Mizote hian Pathian nung ringtu kan ni tih miten an hriat theih nan hmasawnna tur kan ngah hle a, zuk leh hmuama insum kawngah leh hriselna enkawl uluk kawngah te, tlem te thawka tam tak neih tumna thinlung diklo put kawngah te kan insiamthat a tul takzet a ni, a ti a. Ringtu za a za inti te zingah sorkar hmalakna tithuanawp khawpa compensation diklo hmuh tum tam tak an awm thin chu pawi a tih zia sawiin Chief Minister chuan Pathianin ringtute mawhphurhna hrang hrang min pek leh min dahna hmun apiangah rinawm taka thawka, ram leh midangte tana malsawmna nih kan tum theuh tur a ni, a ti.

Kawng hrang hranga Mizoram hmasawnna tur ruahmanna sorkarin a kalpui zingah NLUP chungchang sawiin Chief Minister chuan he programme hi Mizoram mipuiten ei leh bara an intodelhna theih nan leh mi harsa zawk ten lei rem an rah theihna tur atan Pathianin a pek ni a a ngaihthu a sawi a. Sorkar laipuia thuneitute thinlung hnehin he flagship programme tihhlawhtlinna tur sum mamawh tam tak pawh an dil aia tam pek an nih thu a tarlang a. Tunlai khawvelin a buaipui tuihna humhalhte, thing leh mau vah chereu avanga chhehvel boruak chhe zel siam that kawngah te pawh NLUP hi a tangkai a ni, a ti. Kawlphetha a Mizoram a intodelhna theihna tura sorkar hmalak mekna sawi langin Tuirial HEP pawh kumin kum tawpah emaw nakum, kum bul lamah emaw mipuite hman theih tura peihfel a nih a beisei thu a sawi bawk.

Mizoram Legislative Assembly Speaker Pu Hiphei pawhin thu sawiin inthlanna felfai leh thianghlim a awm theihna tura kohhran hmalakna fakawm a ti a. Mizoram sorkarin ram hmasawnna tura hma a laknaah Mizoram kohhran lian ber Presbyterian kohhranin tawiawm a tum avangin lawmawm a tih thu a sawi bawk.

Mizoram Synod chuan ram hruaitute chu Pathian ruat an ni tih kohhranin a pawm a, ram roreltute leh kohhranhote hi Pathian hruaina zuia thawkho tur an ni, an ti a. MLA te chu hleih nei lova dik taka rorel tura ngenin ram hmasawnna hnukpui an thawhna kawngah theihtawp chhuaha bei turin a sawm a. Mizoram leh Cachar inri na venhim thu ah ramri hrula chengte sahimna mai bakah, an huan lo ram venhim leh thlamuang taka an khawsak theih nan sorkarin tan a lak tulin a hria a. Eirukna chu ram hmelma, mihring nun leh rilru tichhetu a nih avangin tibo tura an hmalakna chu hlen chhuak ngei turin an beisei thu an tarlang bawk. MLTP Act, 1995 chungchanga kohhran ngaihdan tarlangin, he dan kenkawh hi kohhranin a thlawp a, chak taka kalpui zel turin ram hruaitute an ngen a ni.