Ni 13th April, 2016 (Nilaini) khan Lawngtlai Chief Medical Officer Conference Hall ah Malaria Do Thla hawnna inkhawm buatsaih a ni a, Malaria natna laka inven a pawimawh zia leh a invenna te, he natna kan kai thin chhan te inzirtir a ni.
He hun hi Dr. HC Thangkima, Chief Medical Officer, Lawngtlai District chuan kaihruaiin, Lalchhuanawmi Khiangte, District Consultant chuan Malaria chungchang Lawngtlai District Report a pe a, kum 2015 chhung khan Lawngtlai District chhungah Thisen test zat hi 48,450 niin, heng zinga 8,398 te chu Malaria vei an ni tih hmuhchhuah a ni a, Malaria vanga thi pakhat an awm thu a tarlang. Kumin January-March thla chhung hian Thisen test 12,701 an neih tawh thu leh Malaria vei 660 hmuhchhuah a nih tawh thu a tarlang bawk.
Dr. Zorammuana, State Consultant M&E, SVBDCP chuan thusawina hun hmangin kum engemawzat kalta a India rama Malaria lar em em thin chu State tinah Malaria Do turin State Vector Born Diseases Control Proggramme din alo ni ta a, ram pumah Malaria Do tura beihpui thlak nghalin chuvang chuan Malaria vanga boral tihtlem lamah kum tin hma kan sawn chho ta zel a ni, a ti. Theihtawp kan chhuah zel chuan tun aia nasa hian hma pawh kan sawn ngei kan beisei, a ti bawk. Tun hnaiah Malaria laka kan him theih nan Thosilen damdawia chiah sa sem a ni a, hei hi anih dan tur ang taka kan hmang anih chuan Malaria vei hi nasa takin kan tlahniam thei dawn a ni tiin Dr.Zorammuana chuan a sawi bawk.
He hunah hian Lawngtlai District chhunga Health Workers leh ASHA workers te an kal tha hle a, hmalak zel dan turte sawihona hun hmangin,zawhna leh chhanna hun hlawk takin an hmang bawk a ni.
