Chief Minister Pu Lal Thanhawla chuan tukin zing khan Lawipu  community hall bula Central YMA (CYMA) ramah CYMA Hostel tur, DoNER Ministry atanga sum hmuh Rs.520.48 lakhs senna tur lungphum a phum. Pawisa sanction hi DoNER Ministry in 90% tumin Mizoram sorkar-in 10% a tum ve ang.

Lungphum phum inkhawm community halla neihah Chief Minister chuan CYMA leh Education department te tangdunin thingtlang atanga Aizawla lehkha zirte tana hostel sak theih tura  hma an lakna chu a lawmawm tak meuh a ni tiin, mamawh angin sorkarin hostel a sa zung zung theilo a ni a ti a. Mimal thahnemngaiten eizawn nan hostel an dinte hi a lawmawm rualin that tawk lohna a awm thu sawiin, Pu Hawla chuan khum intawm te, zirlai tam tak tan inthiarna pakhat chauh siam te leh infiamna hmunhma awmlo leh rikrum thulha hostel building sak dan remchang tawklo te a awm a ni a ti a. Chuvangin khuahkhirh an nihna turin dan zawm tur sorkarin a siam a ngai ta a ni a ti.

Chief Minister chuan tunah hian Lai leh Mara ten an pualin hostel sak theihna an neih tawh thu sawilangin, Pang, Bawm leh Bru ten hostel sak sak turin sorkarah an thlen thin a ni tiin, hei hi school education kaltlanga la ngaihtuah a ni ni ang a ti a. Education tha kan duh chuan environment-in a zir angai tiin, CYMA hostel sakna tur hmun, thing tam tak awmna hi loh theih loh chauh kih tum a ni chu a lawmawm hle a ni a ti.

CYMA President Pu Lalbiakzuala chuan thingtlang atanga Aizawla lehkha zirte tan hostel sak hi YMA conference ah te thutlukna siam tawh a nih thu a sawi a. Hemi lama education department-in hma a la ta hi a lawmawm tak meuh a ni a ti.

School Education Director Pu K.Lalthawmmawia chuan CYMA hminga hostel sak tur hi Mizoramah a hmasa ber anih thu a sawi bawk.

Hostel satu tur Northeast Consultancy Services (NECS) Chief Managing Director Pu Robert Romawia Royte in project report pein, hostel sakna hmun tur hi thing tha tak tak awmna anih avangin thing leh thing inkarah a building block hrang hrangte uluk taka rem anih tur thu sawiin,a lei laih leh thing kih tur tlem thei ang bera ruahmanna siam a ni a ti a. Building hi block A leh B ah then an ni ang a, chutah chuan Lobby, Hall, Cafetaria, Dining Hall, Hostel Block, Common Room, Reading Room, Wardens’ Quarter bakah Toilet Block, Entry leh Parking te siam a ni ang a ti. A project hi tan nghal niin, kum hnih chhunga zo tura ruahmanna siam a ni a. A building floor area hi 1,400 sq.m. vela zau niin, zirlai naupang 120 awm theihna tura ruahman a ni.

Inkhawm hi Pu P.Lalchhuanga, Secretary, School Education Department-in a kaihruai a ni.