Khawlailung Sugarcane Growers’ Association (Fu chingtute) buatsaih “Kurtai Kut” chu vawiin nileng khan Khawlailung Bazar kawnah urhsun taka hman a ni a, AH&Vety Minister Pu C. Ngunlianchunga chu “Kut Pa” niin District bawrhsap Dr. Lalrozama, IAS, Pu Rosiama Vanchhawng, Addl. PCCF, Pi Teresy Vanlalhruaii, MCS, DRDA Project Director bakah mi pawimawh tam takin he Kut hi an chhim a ni.

Kurtai Kut lawmna inkhawm buatsaihah “Kut Pa” Pu C. Ngunlianchunga chuan Khawlailung chu khaw vannei tak an ni tih sawiin Lok Sabha MP kan neih chhunin Mizoram chhunga khaw za tam zingah model vilage a siam atan a thlan hmasak ber leh awmchhun an la ni tiin Khawlailung tih hmasawnna turin Department zawng zawngin theihtawp an chhuah a nia ti a, RKVY atanga an pawisa hmuh zinga 15%zelKhawlailung tan hman tura ruahman anih thu a sawi a ni. Minister chuan Khawlailung chu Bialtu MLA zuan zang leh taima tak mai Pi Vanlalawmpuii Chawngthu an nei leh zel chu an vannei ani tih sawiin anmahni Model Village a thlangtu Lok Sabha MP leh anmahni Bialtu MLA te thahnemngaihna tawmpui a midang entawntlak leh kawng kawhhmuhtu ni tura theihtawp chhuah chhunzawm zel turin khawtual mipuite a fuih a, mi taima leh tumruhte hlawhtlinna a taka hmuhpui thei a a awm chu vannei a in tih thu leh lawmawm a tih thu a sawi a, Khawlailung khua in 500 chuang zinga 80% lai kuthnathawktu an ni chu ropui a tihzia sawiin Mizoram khua zawng zawng zingah Khawlailung aia kuthnathawh uar khua an tam bik lo a ti a, In 500 chuang zinga 130 chauh in Fu an ching chung pawh a hetiang dinhmun an thleng thei anih chuan In 300 talin Fu ching turin tan la se, hei ai hian an hlawhtling lehzual ang a, Sawrkar in NLUP "One Crop, One Village" system a kalpui mek nen a inhmeh bakah a hlawma tharchhuah a tam chuan Sawrkar bakah ram pawn Company lian te tan pawh nasa lehzuala tanpuina leh hma lakpuina kawng a in hawng dawn a ni a ti a, kuthnathawktuten theihtawp an chhuah anih phawt chuan Sawrkar in a thlahthlam bik dawn lo tih a sawi bawk. Minister chuan RKVY hnuaiah Khawlailung atang chhungkaw 6 thlanchhuah an nih tur thu leh tanpuina Rs. 2,50,000/- an dawng dawn a, Vawk tha chi a pui tur 5 leh vawkpa 1 an dawn tur thu a sawi a nipek an ni ang a ti bawk.

Khawlailung hi In 515 khua an ni a, kuthnathawk chhungkua 400 awm in an zinga 130 chuang zetin Fu an ching a, kum kalta 2015 khan Fu atanga siam Kurtai hi Quintal 2500 vel tharchhuakin Rs. 1,25,00,000 /- an thar chhuak a, kuminah hian hei aia tam hi tharchhuah an inbeisei bawk a ni. Kum 1938 vel atang khan Khawlailungah hian Fu an lo ching tan tawh a, kum 2007 ah Fu chingtu pawl (Sugarcane Growers’ Association) din a ni a tun thlengin kum 100 dawn lai Fu an lo ching tawh a ni.

Vawiin Kurtai Kut lawmna inkhawm hi Pu H.Malsawma, Kurtai Kut Organising Committee Chairman in a kaihruai a, Pi C.Laltleipuii, BDO, East Lungdar RD Block in inlawmna thu a sawi a, District Bawrhsap Lalrozama, IAS te, Pu Rosiama Vanchhawng, Addl. PCCF te, Pi Teresy Vanlalhruaii, Project Director, DRDA SErchhip leh Pu C. Vanlalthlana, Manager, MRB New Serchhip Branch ten thu sawiin Pu K.Thangbawia, VCP in lawmthu sawina in hnu a khar a, tlaiah Kut lawmna sawhchiar pir ho a ni.