Vawiin hian Parliamentary Secretary Pu H. Zothangliana, Lawngtlai East Constituency bialtu MLA ni bawk chuan a bial chhung Sangau a Young Lai Association General Conference vawi 27 naah khuallian niin a hman pui.

Thusawiin Pu Zothangliana chuan, Lai hnam hi hman lai chuan hnam huaisen leh tlawmngai niin miten an sawi thin a, vawiinah hian keini an thlahte hian chutiang bawka chawimawi chu kan hlawh em? Tih keimahni theuh kan inzawh a tul hle a ni, a ti. Ram leh Hnam dinchhuahna bul pawimawh tak mai chu mahni intodelhna hi a ni a, kan intodelh lova hna kan thawh nasat loh chuan kan tawngte, kan hnam ziate theihtawp chhuahin chawilar tum mah ila kan ti hlei thei chuangin a rinawm loh a ni, a ti.

Zirna ngaihpawimawh a tul tak zet thu sawiin hriatna a tam poh leh chakna apung thin a, chuvang chuan kan thalai rualte, tuna naupang duhawm tak tak zawng zawngte zirna lama tan la a theihtawp chhuah turin ka sawm tak meuh meuh che u a ni, ruihhlo leh zuk hmuam lama kan sum leh pai luangral nasa lutuk te, kan tak sa in harsatna a tawh phah tam ziate pawh i chhut fovang u, a ti. Ramngaw leh a chhunga nungcha tinreng te hmangaih thara kangmei laka kan ram humhim tlat tura fuihin Pathian malsawmna ropui tak kan dawn mekte hi a petu Pathian hmaa zahpuiawm loh taka kan enkawl a tul hle a ni a ti.

Pu Zothangliana chuan, Myanmar sawrkar thara kan Lai pu Pu Henry Van thio, Second Vice President hiala thlan a ni chu ropui a tih thu sawiin a chhuang tak zet tih a sawi. Pu H. Zothangliana hian YLA Conference puala Souvenir buatsaih lehkhabu Bukbau (Thul) tih chu a tlangzarh nghala, Conference thlengtu Sangau Sub Headquarters hnenah tanpuina a hlan bawk.

Young Lai Association ah hian Branch 105 awmin Group 8 leh Sub Headquarters 4 a awm a, kumina Conference ah hian palai hming ziak lut chu 570 vel niin khaw chhehvel atangin mi engemawzat lehlangin an kal bawk a, Central YMA leh Mara Thalai Pawl (MTP) pawhin aiawh tirin hmanpui a ni.

He Conference hi nizan atanga tan niin naktuk zan hian a tiak dawn a ni.