MAMCO Chairman Dr. Ngurdingliana, MLA chuan June ni 2015, 2016, chawhma dar11:00 khan JNV, Khawzawl Building sak mekte tlawhin, July ni 1 atanga heng building tharte luah lut thei tura ruahmanna lo siam tawh bawhzui anih dan a hmunah kalin a enfiah a ni.

MAMCO Chairman Dr. Ngurdingliana chuan JNV, Khawzawl Staff-te leh Zirlaite, tuna an Building luah lai, Khawzawl Judo Hall atanga JNV Building thara an insawn luh hlima an awmna tura ruahman lailawk Building hrang hrangte a tlawh a, hnathawktute inpuahchah dante chu enfiahin harsatna hrang hrang awmte leh Khawzawl khawtlang hruaituten an ngaimawh lai an thlente chu a ngaihthlaksak a, July ni 1 a insawn theih tura peihfel a nih ngei theih nan hmabak la awm thenkhat - Bathroom leh Toilet tih fai te, Kitchen chei bawl ngai laite, Administrative Block-a la tih zawh loh Electric Wiring, Bathroom leh Railing-te chu chak taka thawk turin thawktute chu a hriattir nghal a. MAMCO Chairman chuan Novadaya Vidyalaya Samiti Headquarters, Delhi-in pawmpui a nih chuan July ni 1-ah hian JNV Building thar hi luah luh anih tur thu amah tawiawmtu, Khawzawl khawtlang hruaitute chu hrilh a, tih fel ngai la awm te pawh July ni 1 hma ngeia tih fel a nih tur thu a sawi a ni.

Chalfilh Bialtu MLA ni bawk, Dr. Ngurdingliana hian D.C. Rest House-ah Khawzawl khawtlang hruaitute a kawm bawk a, hetah hian MAMCO Chairman chuan JNV Building thar tun thlenga luah luh theih a la ni lo chu pawi a tih thu leh hemi chungchangah hian anmahni pawhin mawh an phurh ve avangin, JNV Building hi sak zawh thuai a nih theihna turin theih tawp chhuahin hma a la zui dawn tih a sawi a, a mimal ang pawhin Zirna leh Hriselna hi a ngaih pawimawh ber a ni tih a sawi bawk.

MAMCO Chairman hi khawtlang hruaitute leh tlawmngaipawl hotute bakah MAMCO E.E. i/c Er. Lalbiakthanga leh Staff thenkhatin an tawiawm a ni