Nimin khan Dr. Ngurdingliana, MLA  Chairman, MAMCO in Mamit-a JNV School building sak lai mek a tlawh.

Dr. Ngurdingliana chuan Mamit a JNV building sak mek chu nimin khan a hmunah tlawhin Contractor te chu tun dinhmunah JNV School chu building luah hawha hmun chep tak karah kal an nih avangin, naupang harsatna hria-a, an insak hna chu chak zawka thawk turin a chah a, tun thla ni 10 ral hma ngei a an hna an chhunzawm theih dawn leh dawn loh, amah hriattir tura hrilhin, harsatna hrang hrang avanga an hna an chhunzawm thei dawn lo a nih chuan Department in an chhunzawm mai a ngaih dawn thu leh Central sorkar lama bawhzui ngai ang angte pawh amah ngeiin theihtawpa hmalak sak a tum thu hnathawktute hi a hrilh a ni. Heng building hrang hrang- Administrative Block, Academic Block, Hostel leh kitchen te chu nakum February ral hmaa zawh fel hman turin hmalak anih thu leh kum 2016-17 Academic Session atang chuan an hmunhma hi luah hman tum a nih thu a sawi.

JNV Building hi kum 2012 khan Rs 18.05 crore senga sak tan hna thawh a ni a, Revised Amount hi 36.81 crore thehluh tawh a ni, Rate hi Delhi Schedule of Rate 2007 anga chhut a ni. Heng building hrang hrang thawktu contractor te chuan duh anga an hna chak loh chhan hrang hrang MAMCO Chairman hnena an lo thlen zingah Administrative Approval an hmuh hnu kumkhatah Drawing an hmuh chauh vangte, School hmun petu, ram neituten Strike an neih vangte, Running bill a hun taka an hmuh loh vangte leh tun dinhmunah phei chuan kawng chhiat avanga bungraw phurhna ah harsatna an tawh avang a nih thu an sawi a ni.

MAMCO Chairman hi Lalneihthanga Colney, SDC, Mamit leh Mamit JNV school a thawktu ten an lo dawngsawng a ni.