1023/2026-2027

Dated : Mamit the 16th of June, 2026 : Vawiin khan Chhimveng YMA Hall, Mamit-ah Mamit MZP huaihawtin zirlai titha chawimawina neih a ni a, Pu Vanlalruata, Hon'ble Minister, Agriculture, I&WR, Co-operation chuan Khual Lian nia hun hmanpuiin zirlai tithate chawimawina a hlan.

Khual lian Pu Vanlalruata chuan hmanlai hunah chuan mi tlawmngai, hmingtha leh huaisen te'n chawimawina nopui an dawng thin a, tunah chuan zirna avanga mi hmingthate kan chawimawi ta a, Mamit khua leh tui atanga hetiang zat chawimawi tur an awm chu lawmawm a tih thu leh a lawmpui thu a sawi a. Tunlai khawvelah chuan kan zirna kalphungte a changkang tawh em em a, hei hi kan hman tangkai thiam a ngai a ni ti. Phone games leh social media hman dan chin tawk hriata, in thuhnun tir lovin keimahni zawkin kan thunun tur a ni a, ruihhlo leh a kaihhnawih laka fihlim, nu leh pa thuawih te'n malsawmna leh hlawhtlinna an chang thin a, chutiang mi ni tur chuan zirlai kalkhawmte a chah a ni.

Minister chuan zirna kailawn amah ngeiin a zawh chhoh danah retheihna, zirna bul tanna tha neilo chunga tun dinhmun hruai thlengtu chu Pathian, tawrhchhelhna leh a tum tlat vang a nih thu sawiin zirlai naupangte chu tumna a awm chuan kawng a awm a ni tih hre tlata, an zirlaiah chawimawi tlaka zirna chhunzawma hlawhtlinna duhawm tak chang vek turin duhsakna a hlan a, ram tana mi hmingtha tak takte'n mual an liam tawh a, nakin lawka kan ram leh hnam hruaitu tur kan nih avangin keimahni hun theuhah kan ram Mizoram tana hnutchhiah tha nei tura ngaihtuahna hmang tur leh ram tana mi chhenfakawm tak ni tura theihtawpchhuaha an zirlaite zir tur in a chah bawk.

He hunah hian khualzahawm Pu H. Zorempuia, Finance consultant, MAMCO, Ltd. Special Guest Pu Suvigya S. Chandra, DC Mamit, Khualtha Pu Emmanuela, Addl.DPC, Samagra Shiksha Mamit leh Uaptu Dr. C. Lalremruata, President MZP Gen. Hqrs te chuan hun hmanpuiin zirlaite fuihna thu an sawi a ni.

Vawiin-a zirlai titha chawimawite hi HSLC atangin 1st Div with Letters chin mi - 26, HSSLC atangin mi - 11, HSLC Top 10-a in hlangkai mi - 2, HSLC Subject topper mi 1 leh Institution Topper mi - 3 bakah MES tlingthar mi 1 te hnenah chawimawina hlan an ni.

He hun hi Pu Lalthansanga, President MZP, Mamit chuan kaihruaiin Pu Goerge Lalruatmawia, Secretary, MZP Mamit chuan report a pe.