1024/2026-2027 

Dated Khawzawl, the 16th June, 2026 : Vawiin khan Food, Civil Supplies & Consumer Affairs (FCS&CA) Minister Pu B. Lalchhanzova’n Zuchhip khaw hmun hlui lungphun hawngin, a hawnna inkhawm chu khuallian niin a hmanpui a, Aizawl Municipal Corporation Executive Corporator Pi Christina Roluahpuii Sailo chu khualzahawm a ni.

Khuallian Pu B. Lalchhanzova chuan lungphun hawnna inkhawmah hian Zuchhip khawchhuak thlah a nih thu tarlangin, Zuchhip khawchhuak thlah kal zelten Zuchhip khua hre reng chunga an pi leh pute lu nghahna hmun an cheibawla roh taka an enkawl chu ropui a tih thu a sawi a. Mahni pi leh pute khawchhuahna hmun hi zahpui lova kan hriatreng hi a pawimawhin, malsawmna dawnna a ni a ti a. Hemi hmunah ruihhlo ngaite enkawlna tur Chhanchhuahna Home din a ni chu tha a tih thu sawiin, an inenkawl dan leh Home-a awmte pawh intodelha mahni ei tur an thawkchhuak thei chu chhinchhiahtlak a tih thu a sawi bawk a. Zuchhip Hmun Hlui Humhalhtu Pawl hmalakna chu fakawm tlak a tih thu sawiin, an kal zelna turah duhsakna a hlan a ni.

Khualzahawm Pi Christina Roluahpuii Sailo pawhin kalkhawmte hnenah Zuchhip khawchhuak AMC Corporator an neih thu sawiin, Zuchhip khaw mipuiten Aizawl-ah Zuchhip khawchhuak thlenna an nei a ni tih hriaa, harsatna an neihte pawh a hnena thlen hreh lova, a theih ang anga a lo puih tur thu a sawi bawk.

Zuchhip Hmun Hlui Humhalhtu Pawl hi 2019-a din a ni a. An hmalaknain Zuchhip hmun hlui huam chhunga lungdawh leh thlan awmte humhalh a ni a, ruihhlo ngaite enkawlna tur Chhanchhuahna Home chu 2020 khan din a ni bawk. PHE Dept, Zuchhip VC leh Khawzawl BDO-te puihnain tui dahkhawlna tur water tanky an nei a. P&E Dept puihnain transformer tha tak an nei bawk a. Chhanchhuahna Home-ah hian khum 34 awmin, tunah hian mi 32 an awm mek a, rawngbawltu 10 an awm a ni.