1025/2026-2027 

Dated Serchhip, the 16^th June 2026: Vawiin khan Mizoram State AIDS Control Society (MSACS); District Hospital Serchhip Blood Centre leh Association for Voluntary Blood Donation (AVBD) Serchhip Branch huaihawtin, ‘World Blood Donor Day-2026’ puala thisen petute chawimawina hun, Serchhip Sub-Hqrs. YMA Hall-ah buatsaih a ni a. Serchhip District Information & Public Relations Officer  Pu R. Vanneihtluanga’n khuallian niin hun a hmanpui.

He hun hmanpuitu Serchhip DIPRO Pu R. Vanneihtluanga chuan thisen pek chu midangte nunna chhanna pawimawh tak a nih thu sawiin, “Thisen kan pek hian mi tam tak nunna kan pawhsei sakin kan chhan a ni mai lo va, thisen mamawhtu, retheihna avang te, natna khirh tak avangtea indawm kun mekte chuan, hetianga a thlawna thisen kan pek thinte avang hian thlamuanna hlu tak an lo neih phah thin a ni” tiin thisen pek ngai pawimawha, mi dangte tana malsawmna nih tum zel turin he huna kalkhawmte chu a chah a. Thisen petute chawimawina hun buatsaih a ni chu lawmawm a tih thu a sawi bawk.

He hunah hian District Hospital Serchhip Blood Centre-a Blood Bank Officer Dr. Lalruatliana Pachuau leh Association for Voluntary Blood Donation (AVBD) Serchhip Branch-a President, Pu Zonunsanga Kawlni te pawhin thu an sawi bakah Serchhip Blood Centre atangin Pu Lalhruaitluanga chuan Report a pe bawk a. April 1, 2025 leh March 31, 2026 inkara District Hospital Serchhip Blood Centre-a tlawmngaia thisen petu pawl hrang hrang 29 te hnenah lawmthu sawina leh chawimawina thilpek hlan a ni bawk.

April 1, 2025 atanga March 31, 2026 chhung khan District Hospital Serchhip Blood Centre-ah hian thisen Unit 690 pek niin heng zinga Unit 590 chu Voluntary Donation a ni a, hemi hun chhung hian Blood Donation Camp tum 31 huaihawt niin pawl pahnih te chuan tum hnih an pe hman a. Hemi hun chhung vek hian thisen Unit 560 pekchhuah a ni.

Vawiin hun hi AVBD Serchhip Branch-a Vice President Pu Ramdinthara Kawlni chuan kaihruaiin AVBD Serchhip Branch-a Secretary, Pu T. Biakchamliana kaihhruaiin he huna tel te hian World Blood Donor Day puala thutiam chu an chham rual bawk a ni.

‘World Blood Donor Day’ hi kum 2004 atang khan kumtin June 14-ah hman thin niin kumin hian Pathianni-ah a tlak avangin Serchhip-ah chuan vawiin June 16 khan hman a ni.