Ram chhung hmun dangte rualin vawiin khan DC Conference Hall, Mamit-ah Civil Services Day vawi 13-na hman a ni a. He hun hi Pu Jacob Lalawmpuia, Addl. DC, Mamit-in a kaihruai.

Pu Jacob Lalawmpuia chuan Civil Services Day hmang tura kalkhawm zawng zawngte chungah lawmthu sawiin Civil Services an nih ang ngeiin mipuite rawngbawlsakna kawngah nasa lehzuala tan la turin a sawm a. Tihhlawhtlin mai theih loh thil pawh nise ti tura kan tumna hrim hrim pawh a hlu a. A hlawhtlin theih lohna lam thlir lova a hlawhtlin hram dan ngaihtuah  zawk thin a pawimawh thu a sawi.

Civil Services Day hmang tura kalkhawmte hian anmahni Office theuha chindan phung tha ber berte inhrilh tawnna neiin Head of Office-te chu hotu ni ringawt lova hmahruaitu nih a pawimawh thu leh a bik takin Works Department te chu an hnuaia thawkte tihphur nan a hmun ngeiah an hnathawhte enpui thin a pawimawh thu tarlan a ni a. Tunah hian SP Office, Mamit hmalakin Mamit District Hospital a hman turin Ambulance Tata Trusts atangin dawn a nih thu tarlan a ni a. Kan hna pangngai bakah ram leh khawtlang tana chhenfakawm tur zawnga kan thiamnate hmang turin Civil Services Day hmannaah hian inchah a ni bawk.

Pi Mary L. Rodinpuii, SDC Mamit chuan India rama Civil Services Day hman tan a nih dan leh a chanchin tlangpui Power Point Presentation hmangin sawifiahna a nei a. Pu Lalrinsanga Hnamte, SDC Mamit chuan lawmthusawina a nei bawk.

Vawiin Civil Services Day hmannaah hian Mamit khawpui chhunga Head of Offices leh an aiawhte an tel tha hle a ni.

Attachment

  • Loading attachment...